Tarik 24, Februar 2022, jolweny mag Russia nochako monjo Ukraine. Mano nokelo chandruok ne ji mang’eny ahinya, kendo ngima ji ne ni kama rach mochunogi chako ringo ka giwuok e miechgi. a

 “Mbom ne muoch koni gi koni. Luoro ma ne wan-go tek kata lero. Ka ne wafwenyo ni nitie geche reru ma ne dhi konyo ji dar, wan be ne wang’ado ni nyaka wadar. Nochunowa weyo gimoro amora chien, nikech ng’ato ka ng’ato ne nyalo mana ting’o bag matin monyalo wuokgo piyo. Gik ma ne wanyalo keto e begego ne gin mana barupewa moko ma wageno, yedhe, pi, kod chiemo ma ting’o yot. Ne wadhi nyaka e stesend gach reru, ka e sechego mbom ne muoch ahinya.”​—Nataliia, ma wuok Kharkiv, Ukraine.

 “Nyaka dakika mogik, pod ne waparo ni lweny ne ok dhi muoch. Kae to ne wachako winjo ka mbom muoch kuonde mopogore opogore e taon, kendo dirisni ne yiengni. Nang’ado ni nyaka awuogi, kendo nakawo mana gik mochuno kende. Nawuok e ot sa 2 okinyi, kae to aidho gach reru ma dhi Lviv, kae to bang’e aidho bas ma dhi Poland.”​—Nadija, ma wuok Kharkiv, Ukraine.

E sulani

•  Ang’o momiyo ji ringo weyo thuchegi?

•  Ere kama joma oringo oweyo thuchegi nyalo yudoe geno?

•  Be Muma nyalo konyo joma oringo oweyo thuchegi kata mana gie sani?

 Ang’o momiyo ji ringo weyo thuchegi?

 Joma ringo ka wuok Ukraine timo kamano nikech monj ma Russia nomonjogo pinyno. Kata kamano, Muma nyisowa gik moko sie momiyo ji ringoga ka wuok e thuchegi:

•   Sirkende mag dhano e piny ngima ok osegatimo gik ma konyo oganda dhano. Thothne, joma nie loch tiyo gi teko ma gin-go e hinyo jowetegi.​—Eklesiastes 4:1; 8:9.

•   Satan Jachien ma e “jaloch mar pinyni” chiko oganda dhano e okang’ malach ahinya, e momiyo Muma wacho ni “piny duto ni e teko mar ng’at marach.”​—Johana 14:30; 1 Johana 5:19.

•   Mopogore gi chandruoge mamoko mosechando dhano kuom higni mang’eny, sani wadak e kinde ma Muma nokoro niya: “Kinde matek ahinya nobedie e ndalo mag giko.” (2 Timotheo 3:1) Ndalo mag gikogi opong’ gi lwenje, masiche ma ok nyal geng’, nok mar chiemo, kod tuoche ma landore, ma gin gik ma miyoga ji dar ma wuog e miechgi kata thuchegi.​—Luka 21:10, 11.

 Ere kama joma oringo oweyo thuchegi nyalo yudoe geno?

 Muma nyisowa ni Jehova b Jachuechwa en Nyasaye ma jahera kendo ma kecho nyaka jogo moringo oweyo thuchegi. (Rapar mar Chik 10:18) Osingo ni obiro tieko chandruoge duto ma joma oringo thuchegi yudoga, kotiyo gi lochne manie polo, ma en Pinyruodh Nyasaye, ma biro golo sirkende duto mag dhano. (Daniel 2:44; Mathayo 6:10) Jehova biro tiyo gi Pinyruodhe e ketho Satan Jachien. (Jo-Rumi 16:20) Loch mar Pinyruodhno biro kwako piny ngima, kendo obiro tieko pogruok duto ma ji jobedogo nikech kiewo mag pinjegi. Dhano duto e piny ngima biro dak mana ka jo ka ng’ato achiel. Onge ng’ato ang’ata ma nochak oring kendo ka wuok e dalane, nikech Muma singo kama: “Ng’ato ka ng’ato nobed e tiend yadhe mar mzabibu kod mar ng’ope, onge ng’at ma biro bwogogi, nimar dho Jehova Nyasach oganda lweny osewacho mano.”​—Mika 4:4.

 Pinyruodh Nyasaye kende e ma biro tieko chuth chandruoge ma betiega nikech joma ringo ka weyo thuchegi. Jehova biro tiyo gi Pinyruodhe e golo chandruoge duto ma miyo ji ringoga ka wuok e thuchegi. Ne ane ranyisi moko:

•   Lwenje. ‘Jehova biro tieko lwenje e piny duto.’ (Zaburi 46:9) Mondo ing’e kaka mano biro timore, som sula ma wiye wacho ni, “Ere Kaka Ibiro Kel Kuwe e Piny?”

•   Sand kod timbe mahundu. ‘Jehova biro golonegi gik ma diyogi kaachiel gi timbe mahundu.’ (Zaburi 72:14) Mondo ing’e kaka ji nyalo lokore ma giwe timbe mosegurore e chunygi kuom higini mang’eny, som sula mopogore opogore manie bwo wich ma wacho ni, “Kaka Wanyalo Loyo Sigu.”

•   Dhier. ‘Jehova biro reso jachan ma ywakne.’ (Zaburi 72:12) Mondo ing’e kaka Jehova biro tieko gik ma kelo dhier kata chan, som sula ma wiye wacho ni, “Je, Inawezekana Kuwa na Mfumo wa Kiuchumi Wenye Usawa?”

•   Nok mar chiemo. “Cham nobed mang’eny e piny.” (Zaburi 72:16) Mondo ing’e okang’ ma Nyasaye biro kawo mondo one ni onge ng’ato ang’ata ma bedo gi kech, som sula ma wiye wacho ni, “Ulimwengu Usio na Njaa.”

 Be Muma nyalo konyo joma oringo oweyo thuchegi kata mana gie sani?

 Ee, en kamano. Mopogore gi miyo joma kamago geno maber mar kinde mabiro, Muma nyalo konyogi bende mondo ginyagre gi chandruoge ma giromogo gie sani.

 Puonj ma Muma chiwo: “Kik uparru e wi gimoro amora, to kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayou; eka kuwe mar Nyasaye ma loyo ng’eyo duto biro rito chunyu kod pachu.”​—Jo-Filipi 4:6, 7.

 Tiend puonjno: Kata weche tek manade, kwa Nyasaye mondo okonyi ibed gi paro makare kod chuny mokue. Ne sula ma wiye wacho ni, “Wafilipi 4:6, 7​—‘Msihangaike Kuhusiana na Jambo Lolote.’”