E piny ma ngima, ji mang’eny nyagore gi chandruoge ma ohula kelo. Ne ane ripode ma luwogi:

•   “Ndalo moko matin mokalo, koth maduong’ osebedo ka chue e taon maduong’ mar China, koth ma pok nochuega e pinyno kuom higni 140 mokalo . . Kodhno nochue chakre chieng’ Ngeso nyaka chieng’ Tich Adek kendo pi nopong’, ma ka nopim kiwuok e lowo to ne romo milimita 744.8.”​—AP News, Agost 2, 2023.

•   “Kodh yamo maduong’ miluongo ni Typhoon Khanun ma chue yo milambo mar Japan, ma kawuono Tich Ang’wen en odiechenge mar ariyo nyaka nochak chue osenego ji ariyo. . . . Wachore ni kodhno biro chue ma pi pong’ ma kopim kiwuok e lowo to romo fut 2 e wi gode mag central Taiwan.”​—Deutsche Welle, Agost 3, 2023.

•   “Ohula nomuomo [e taon mar Nova Scotia] nikech koth maduong’ ma nochue e alwora mar Atlantic Canada. Koth maduong’ kamano pok nochuega kuom higni 50.”​—BBC News, Julai 24, 2023.

 Ang’o ma Muma wacho e wi weche kaka mago?

 Muma wacho ni wadak e kinde miluongo ni “ndalo mag giko.” (2 Timotheo 3:1) Yesu nokoro ni e kindewagi ne wadhi neno “gik ma kelo luoro,” kata ma bwogo ji. (Luka 21:11) Lokruoge ma timore e kor lwasi osekelo chandruoge madongo kendo chandruogego medore ameda.

 Muma wacho ni gik ma timore ma miyo ji luoro e kindewagi onego omi wabed gi geno. Nikech ang’o? Yesu nowacho kama: “Sa ma uneno gigi ka timore, ng’euru ni Pinyruodh Nyasaye chiegni.”​—Luka 21:31; Mathayo 24:3.

 Gik ma timore sani nyiso ni Pinyruodh Nyasaye biro loso piny obed maber moriwo nyaka yo ma pi lwororego mondo e ka olos koth.​—Ayub 36:27, 28; Zaburi 107:29.

 Mondo ing’e kaka Pinyruodh Nyasaye biro loso piny mondo obed maber ne sula ma wiye wacho ni “Ni Nani Atakayeiokoa Dunia?”