Ji ma dirom bilion abich biro ng’iyo jotugo ma wuok e pinje 206 ka piem e tuke mag Olimpiks ma higa 2024. Thomas Bach ma en President mar International Olympic Committee nowacho kama: “Tukego biro riwo jopiny duto mondo gidag gi kuwe. Kuom mano, onego wane kinde mag Olimpik kaka kinde mag dak gi kuwe kendo dak maber gi dhano wetewa, ma onge gima pogowa.”

 Be tuke mag Olimpiks nyalo chopo wechego? Be nitie geno ni chieng’ moro dhano biro dak gi kuwe kod winjruok maber?

 Olimpiks ma higani nigi weche mang’eny, mopogore gi tuke kende. Ojiwo ahinya weche mosebedo ka pogo ji kaka siasa kod kit ngima ji. Wechego oriwo ratiro ma dhano nigo, buono jomoko nikech pien dendgi, din ma giaye, kod kedo mondo ji duto obed ma romre.

 Tuke ma riwo ji moa e pinje mopogore opogore keloga mor. Kata kamano, tukego bende niga gi timbe moko ma samoro nyalo kelo pogruok mosiko e kind dhano.

 Muma nokoro ni nitie kido moko ma ji ne dhi nyiso e ndalo mag giko ma ne dhi miyo kuwe bedo ma onge. (2 Timotheo 3:1-5) Mondo iyud weche momedore e wi weche ma nokorgo, inyalo somo sula ma wiye wacho ni, “Je, Biblia Ilitabiri Mitazamo na Matendo ya Watu Leo?”

 Muma singo ni e kinde mabiro, dhano duto biro dak gi kuwe gi winjruok maber e piny ngima. Osingo ni dhano duto e piny biro bedo e bwo sirkal manie polo miluongo ni “Pinyruodh Nyasaye.”​—Luka 4:43; Mathayo 6:10.

 Ruodh Pinyruodhno ma en Yesu Kristo biro kelo kuwe e piny ngima. Muma wacho kama:

•   “Jo makare biro dhi maber, kendo kuwe biro bedo mogundho.”​—Zaburi 72:7.

•   “Obiro reso jachan ma ywakne . . . Obiro golonegi gik ma diyogi kaachiel gi timbe mahundu.”​—Zaburi 72:12, 14.

 Kata mana e kindewagi, puonj mag Yesu oseriwo ji milionde mang’eny mawuok e pinje 239. Joneno mag Jehova e piny mangima osepuonjore kaka ginyalo dak gi kuwe. Mondo ing’e kaka gitimo kamano, inyalo somo Ohinga mar Jarito ma wiye wacho ni “Ang’o Minyalo Timo Mondo Kik Ibed gi Sigu gi Ng’ato Ang’ata?”