E dwe mar Julai 2022, ripode mowuok e piny ngima nonyiso ni piny nobedo maliet moloyo kinde moro amora mosekalo:

•   “E dweni, China oselando diriyo ni liet omedore ahinya e taonde ma dirom 70.”​—Julai 25, 2022, CNN Wire Service.

•   “Nikech liet omedore ahinya e pinje mag Europe, meje ma muoch kendgi e bunge sani omedore ahinya e pinjego.”​—Julai 17, 2022, The Guardian.

•   “Chieng’ Jumapil, taonde mang’eny e piny Amerka nobedo maliet e okang’ ma pok none nyaka nene, kendo lietno nolandore nyaka e alwora ma yo ugwe mar pinyno kaachiel gi milambo kod imbo.”​—Julai 24, 2022, The New York Times.

 Mago duto nyiso ang’o? Be pinyni biro chopo kama koro onge ng’ama nyalo dakie? Ang’o ma Muma wacho?

 Ee. Liet ma sani ng’eny e piny ngima nyiso ni weche ma nokor e Muma sani timore. Kuom ranyisi, Yesu nokoro ni “gik ma kelo luoro” ne dhi betie e ndalo mag giko. (Luka 21:11) Liet ma sani medore e piny ngima osemiyo ji mang’eny obedo maluor ni gik ma ji timo e pinyni biro kethe ma chop kama koro ji ok nyal dakie.

 Ooyo. Nyasaye nochueyo pinyni mondo dhano odagie nyaka chieng’. (Zaburi 115:16; Eklesiastes 1:4) Ok obi yie mondo dhano okethe; kar mano, osingo ni obiro “ketho jo ma ketho piny.”​—Fweny 11:18.

 Ne ane weche mamoko ariyo ma Nyasaye osingo ma biro timore e kinde mabiro:

•   “Thim kod piny motwo nobed mamor, ee, thim nobed mamor kendo nothiew ka safron.” (Isaya 35:1) Nyasaye ok bi yie mondo piny okethre ma chop kama ji ok nyal dakie; kar mano, obiro miyo kuonde motwo e piny obed maber kendo.

•   “Irito piny maber, imiyo omew kendo onyak maber.” (Zaburi 65:9) Nyasaye biro miyo piny obed paradiso.

 Mondo ing’e weche momedore e wi kaka lokruok ma timore e kor lwasi chopo weche ma nokor e Muma, som sula ma wacho ni, “Biblia Inasema Nini Kuhusu Mabadiliko ya Hali ya Hewa na Wakati Wetu Ujao?”

 Mondo ing’e weche momedore e wi gima Nyasaye biro timo mondo pinyni obed kama ber kendo, som sula ma wacho ni, “Ni Nani Atakayeiokoa Dunia?”