E higa mar 2024, ji biro goyo ombulu ka giyiero jotelo kuonde mopogore opogore e piny ngima. Kata kamano, ji mang’eny oseweyo geno josiasa.

•   Thoth jotim nonro e piny Amerka wacho ni “tinde josiasa oketo pachgi mana kuom ber ma ginyalo yudo giwegi,” kar mondo giket pachgi e konyo jopiny. a​—Pew Research Center, Septemba 19, higa 2023.

 Kata mana rowere mang’eny tinde ok ogeno josiasa.

•   “Rowere gombo ni otieknegi chandruogegi, kata kamano, giwacho ni mano gima otamo josiasa.”​—The New York Times, Januar 29, higa 2024.

•   “Nonro moro ma notim nyiso ni rowere tinde ogeno weche ma giyudo e YouTube moloyo kaka gigeno josiasa.”​—The Korea Times, Januar 22, higa 2024.

 Be wanyalo bedo gadier ni josiasa biro kelo lokruok e piny? En ng’a monego wagen?

 En adier ni ji onego ong’e maber joma onego gigen. Muma wacho ni “ng’at ma riekone tin yie gi gimoro amora, to ng’at mariek paro ka pok okawo okang’ moro amora.”​—Ngeche 14:15.

•   Mondo ing’e kaka inyalo fwenyo weche monego igen, som sula ma wacho ni “Jilinde Dhidi ya Habari za Uwongo.”

 E wi mano, kata mana jotelo ma nigi gombo mar konyo ji, onge gi nyalo mar tieko chandruoge duto mag dhano. Mano e momiyo Muma wachonwa kama:

•   “Kik iket genoni kuom ruodhi mag piny, kata kuom dhano matho maok nyal waro ng’ato.”​—Zaburi 146:3, Bible in Luo, 2003.

 Muma wacho ni Nyasaye oseyiero jatelo minyalo gen ma en Yesu Kristo. (Luka 1:32, 33) Yesu e Ruoth mar Pinyruodh Nyasaye kendo Pinyruodhno en sirkal mochung e polo.​—Mathayo 6:10.

•   Puonjri mondo ing’e gimomiyo onego igen Yesu kod gik mobiro timo mondo otieknwa chandruogewa duto. Som sula ma wiye wacho ni “Ruodh Pinyruodh Nyasaye En Ng’a?” kod ma wacho ni “Ang’o ma Pinyruodh Nyasaye Biro Timo?”