“Pile ka pile nitie gik ma timorega ma ketoga dichwo gi chiege e tem mar nyiso ka be gihore kata ooyo. Sama ng’ato pok odonjo e kend, samoro onyalo paro ni ohorega malich, to kosedonjo e kend e ka ofwenyo ni kare horuok dwarore moloyo kaka noparoga.”​—John.

•  Ang’o momiyo dwarore ni ihori?

•  Ere kaka inyalo nyiso ni ihori?

•  “Horuok dwarore ahinya”

•   Kend nyalo miyo ine nyawo mag jaodi.

   “Bang’ bedo e kend kuom kinde malach, yot ahinya mondo ng’ato ochak keto pache kuom kido maricho mag jaode. Sama mano otimore, yot ahinya mondo ng’ato owe hore gi jaode.”​—Jessena.

•   Ka ok ihori, inyalo wacho gimoro ma iywag ang’e bang’e.

   “Akiaga pando pacha, omiyo, arikniga wuoyo. Ka anyalo bedo ng’at ma hore, anyalo ng’iyo gik moko gi paro mowinjore mi aling’ aling’a ma ok awacho gimoro.”​—Carmen.

   Muma wacho niya: “Hera hore mos kendo ong’won.” (1 Jo-Korintho 13:4) Yot paro ni ji ariyo moherore nyaka nyisga horuok. To ok en-ga kamano kinde duto. John ma nosewuo kuome motelo wacho kama: “Mana kaka kido mamoko mabeyo, lalo horuok yot moloyo yude. Mondo wasik ka wan joma hore, nyaka watim kinda mang’eny.”

•   Sama jaodi otimo gimoro apoya ma temo horuokni.

   Kuom ranyisi: Jaodi nyalo wachoni gimoro ma wang’o iyi. Yot ahinya mondo in be iwuone marach.

   Puonj ma Muma chiwo: “Kik ibed ng’at ma chwanyore piyo, nimar jo mofuwo e ma chwanyore mayot kamano.”​—Eklesiastes 7:9.

   Kaka inyalo nyiso ni ihori: Ling’ komondi. Ka pok iwuoyo, tem ane paro ka dibed ni jaodi owachoni gino mondo ochwanyi goyiem koso nitie gimachielo momiyo owuoyo kamano. Buk miluongo ni Fighting for Your Marriage wacho kama: “Thothwa rikniga kawo okang’ ka luwore gi gima waparo apara ni jaodwa temo wacho to ok gima en owuon en-go e pache.”

   To kata abed mana ni jaodi manyo dhogi wach goyiem, pod onego ihori mondo kue obedie kar chwalo mach. Muma wacho kama: “Ka yien onge, to mach tho.”​—Ngeche 26:20.

   “Sama ichako paro e chunyi ni jaodi oselokore jasiki, ling’ matin kae to ipar ane gimomiyo ihere, kae to tem mapiyo itimne gimoro maber.”​—Ethan.

   Wach monego ipar:

  •  Itimoga nang’o sama jaodi owacho kata otimo gimoro mochwanyi?

  •  Ere kaka inyalo nyiso horuok kinde ma biro ka po ni onwoyo gima kamano?

•   Sama jaodi osiko ka timo gimoro ma ok iheroga.

   Kuom ranyisi: Jaodi dekoga kinde duto, ma miyo inyaloga rite ma iyi wang’.

   Puonj ma Muma chiwo: “Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo.”​—Jo-Kolosai 3:13.

   Kaka inyalo nyiso ni ihori: Tem manyo yore mag tego kend maru kar rango mana dwachi iwuon. Penjri kama: ‘Ka ayie mondo wachni ochwanya, mano dhi kelo tungni e kend marwa, koso odhi miyo weche obed maber?’ Par bende ni “waduto wachwanyore nyading’eny.” (Jakobo 3:2) Mano nyiso ni in be nitie gik monego imed timoe maber moloyo.

   “Nitie seche ma anyalo hora gi osiepna moloyo kaka ahoraga gi chwora. Aparo ni en nikech ang’eyo nyawo mag chwora ahinya nikech an kode pile. Kata kamano, horuok nyiso ni ihero ng’ato kendo imiye luor, to mago kido ma dwarore ahinya e kend.”​—Nia.

   Wach monego ipar:

  •  Ihoriga e okang’ ma romo nade gi nyawo mag jaodi?

  •  Ere kaka inyalo hori kode momedore e kinde ma biro?