•   Ihero timo atima gik moko ma ok ichano, to jaodi ohero timo gik moko gi chenro.

•   In ng’at mohero ling’ kendo ma hinyo bedo kar kende, to jaodi en ng’at mohero wuoyo kendo mohero bedo gi ji.

 Be jaodi nigi kido moro ma ok moriga? Keto pachi ahinya kuom kidono nyalo kelo tungni e kend maru. Bende, Muma wacho ni “ng’at ma siko ka wuoyo e wi wach moro pogo osiepe moherore.”​—Ngeche 17:9.

 Kar weyo mondo kido ma ok morino okel ywaruok e kindu, inyalo puonjori neno kidono e yo mowinjore.

E sulani, wabiro nono

•  Kaka inyalo bedo gi paro mowinjore e wi kido moko ma ok mori kuom jaodi

•  Gik ma joma okendore wacho

•  Gik munyalo wuoyoe

 Kido moro ma ok ihero kuom jaodi nyalo bedo ni otudore ahinya gi kido mihero kuome. Ne ane ranyisi adekgi:

 “Jaoda en ng’ama timoga gik moko mos kendo ok ong’eyo ikore piyo sama wadwaro dhi kamoro. To konchiel, kidono e momiyo en ng’at ma horega gi ji, moriwo nyaka an. Seche moko, achwanyoraga kotimo gik moko mos, kata kamano, adiera en ni mano en achiel kuom kido ma ahero kuome.”​—Chelsea.

 “Jaoda oheroga chano adimba gik mobiro timo. Odwaroga ni sama otimo gigene, to kik gimoro siek ma ne ok ochano, to mano seche moko chwanyaga. Kata kamano, kido ma en-gono konyowaga timo gik moko e wang’ sa.”​—Christopher.

 “Jaoda en-ga ng’ama odhil, to seche moko mano chwanyaga. Kata kamano, yo ma okuwegago mos sama weche tek en achiel kuom kido ma noywaya ire. Aheroga kaka onyalo kuwe mos sama weche tek.”​—Danielle.

 Mana kaka waneno e ranyisi mar Chelsea, Christopher, kod Danielle, nyalo moko ma ng’ato nigo kod nyawo moko monyalo bedogo e ma samoro koriw to loso kido mabeyo ma wahero kuome. Omiyo, ka nyawadwa nigi kido moro ma ok morwa, onego wanon bende ber ma kidono nyalo kelo. Kik wang’i mana konchiel kende.

 En adier ni kido moko ok beyo kata matin. Kuom ranyisi, Muma wacho ni nitie jomoko ma gin ‘jo mirima.’ (Ngeche 29:22) E chal kaka mano, dwarore ni ng’ato otim kinda mondo ogol kuome “kit kecho mag himruok duto, gi mirima, gi ich-wang’, gi dhawo, kod ayany.” a​—Jo-Efeso 4:31.

 To ka kido moro ok rach, en mana ni ok omori, tem luwo puonj mar Muma ma wacho niya: “Ng’ato ka ng’ato mondo odhi nyime nano gi nyawadgi . . . kata ka ng’ato nigi wach moro gi nyawadgi.”​—Jo-Kolosai 3:13.

 E wi mano, tem ane paro ber mar kidono ma samoro e ma noywayi machiegni gi jaodi. Dichwo moro ma nyinge Joseph wacho kama: “Sama waketo pachwa e kido moro ma ok wahero, mano chalo mana gi ng’at ma rango kaka kidi mar almasi nigi konde mabith, kar keto pache e ber mar kidino duto.”

 Mokwongo, ng’ato ka ng’ato kuomu nyalo paro matut e wi penjo maluwogi. Kae to unyalo wuoyo e wi penjogo kanyachiel.

•   Be jaodi nigi kido moro ma ok mori ma kelo ywaruok e kindu? Ka en kamano, en kido mane?

•   Be kidono en kido marach adier, koso en aena kido ma ok mori?

•   Be nitie ber moro amora e kidono? Ka en kamano, en ber mane, to ang’o momiyo mano mori?