GIK MA NYALO KONYO JOOT
Kaka Inyalo Konyo Nyithindi Sama Weche Ok Odhinegi Kaka Gidwaro
Nitie kinde ma chuny nyithindi nyaloga nyosore nikech weche ok odhinegi kaka gidwaro. Ere kaka inyalo konyogi e kinde ma kamago?
Gik monego ing’e
Waduto nitie seche ma weche ok dhinwa kaka wadwaro. Muma wacho ni ‘waduto wachwanyorega.’ (Jakobo 3:2) Nyithindo bende chwanyorega. Kata kamano, chwanyruok nyaloga puonjowa weche moko. Kuom ranyisi, nyithindo matindo ok ong’eyoga kaka ginyalo nyagore gi chandruok moro; omiyo, sama gichwanyore, ginyalo puonjore gima ginyalo timo mondo kinde ma biro gigeng’ chwanyruok ma kamano. Miyo moro miluongo ni Laura wacho kama: “An gi jaoda wasefwenyo ni ber mondo nyithindo opuonjre gik ma ginyalo timo sama weche ok odhinegi kaka gidwaro, moloyo fwayo afwaya wachno. Mano konyogiga ahinya.”
Nyithindo mang’eny ok timga gik makare sama weche ok odhinegi kaka gidwaro. Mano timorega nikech samoro jonyuolgi e ma nyisogiga ni onge gima rach ma gitimo. Kuom ranyisi, ka nyathi orem e penj, jonyuol moko ketoga ketho kuom jopuonj. Bende, sama nyathi ochwanyore gi osiepne, jonyuol moko biro keto ketho kuom osiepneno.
Kuom adier, be nyithindo nyalo ng’eyo ting’ ma gin-go sama weche ok odhinegi maber ka po ni jonyuolgi siko desogi kata nyisogi ni onge makosa ma gitimo?
Gik minyalo timo
Puonj nyithindi ni gik ma gitimo nyalo kelo ber kata rach.
Muma wacho niya: “Gimoro amora ma ng’ato chuoyo, mano bende e ma noka.”—Jo-Galatia 6:7.
Gimoro amora ma ng’ato timo nyalo kelone ber kata rach. Sama watimo gima rach, wabiro kayo mana rach lilo. Dwarore ni nyithindo ong’e ni sama gimoro ma gitimo ok odhinegi kaka ne gidwaro, nyaka bed ni nitie gimoro ma ok gitimo kaka dwarore. Omiyo, tem matek kik iket ketho kuom jomoko sama nyithindi otimo gimoro e yo ma ok owinjore. Kar mano, ka luwore gi hikgi, inyalo weyogi mondo gika gima gichwoyo. Dwarore ni nyithindo ong’e maber tudruok ma nitie e kind gik maricho ma gitimo kod lit ma gigo kelo.
Kony nyithindi kaka ginyalo loso weche.
Puonj ma Muma chiwo: “Ng’at makare nyalo lwar dibiriyo, to obiro chung’.”—Ngeche 24:16.
Wawinjoga malit sama weche ok odhinwa kaka ne wadwaro, kata kamano, mano ok nyisga ni pi oseduwore chuth. Puonj nyithindi mondo ging’e gima onego gitim sama weche okethore, kar badhruok kata keto ketho kuom jomoko. Kuom ranyisi, ka wuodi orem e penj moro e skul, konye ng’eyo kaka onyalo somo matek mondo obi okal penj machielo. (Ngeche 20:4) Ka po ni nyari ochwanyore gi osiepne moro, konye ng’eyo kaka onyalo kawo okang’ mokwongo mondo olos weche, bed ni en e ma okoso ne osiepne kata osiepne e ma okosone.—Jo-Rumi 12:18; 2 Timotheo 2:24.
Puonj nyithindi mondo ging’e ni nitie gik ma ginyalo kod ma ok ginyal.
Puonj ma Muma chiwo: “Awacho ne ji duto manie kindu kanyo ni, kik ng’ato opar ni olong’o moloyo kaka ochal.”—Jo-Rumi 12:3.
Nyiso nyathini ni en e ma ong’eyo timo gimoro moloyo jowetene duto, ok kony kata matin. Mano en nikech kata mana nyithindo ma riekga e skul, ok bedga namba achiel e penj duto ma gitimo. Bende, nyithindo ma timoga maber e weche tuke ok lochga kinde duto. Nyithindo ma ong’eyo ni nitie gik ma ginyalo kod ma ok ginyal nyagorega maber sama weche ok odhinegi kaka gidwaro.
Muma wacho ni tembe nyalo miyo wabed motegno kendo konyowa nyago kido mar sinani. (Jakobo 1:2-4) Omiyo, kata obedo ni chuny janyosore sama weche ok odhi maber, kony nyithindi ong’e ni chunygi ok onego ojog chuth mana nikech wach moro ok odhinegi kaka ne gidwaro.
Puonjo nyithindo mondo ging’e gima ginyalo timo sama weche ok odhinegi maber en gima dwaro thuolo kod teko. Kata kamano, mano biro konyogi ahinya nyagore gi pek ma gibiro romogo kinde ma koro gichako pong’. Buk moro miluongo ni Letting Go With Love and Confidence wacho niya: “Rowere mong’eyo gima onego gitim sama weche ok odhinegi kaka gidwaro, kinde mang’eny ok many yore maricho mag chopo dwachgi. Yot mondo gidhi maber sama giromo gi weche manyien kata weche mopoyogi.” Kuom adier, mano konyogiga nyaka ka gisebedo joma dongo.
Tim kama: Ket ranyisi maber. Par ni, gik ma itimo sama weche ok odhini maber, e ma nyithindi bende biro timo sama weche ok odhinegi maber.