“Kik iluor, nimar an kodi. Kik iparri, nimar an e Nyasachi. Abiro tegi, ee, abiro konyi, anamaki motegno gi bada ma korachwich ka atayi e yo makare.”​—Isaya 41:10, Loko mar Piny Manyien.

 “Kik iluor, ni kech an kodi; we ng’eng’, ni kech an Nyasachi: anamii teko; ee, nakonyi; ee, nasiri gi lueta marachwich, an matimo kare.”​—Isaya 41:10, The Bible in Luo, 1968.

 Jehova a singo ne jotichne momakore kode ni obiro sirogi e masichegi duto kata bed ni gin masiche machalo nade.

 “An kodi.” Jehova nyiso jotichne gimomiyo onego kik giluor​—ok gin kendgi. Nikech Jehova neno gik ma gikaloe kendo owinjo lamogi, chal ka gima en kodgi e chandruok moro ma omakogi.​—Zaburi 34:15; 1 Petro 3:12.

 “Nimar an e Nyasachi.” Jehova hoyo chuny jotichne kuom paronegi ni en Nyasachgi kendo oyie kodgi kaka jotichne. Jotichne nyalo bedo gadier ni onge gimoro amora ma nyalo mono Nyasaye konyogi.​—Zaburi 118:6; Jo-Rumi 8:32; Jo-Hibrania 13:6.

 “Abiro tegi, ee, abiro konyi, anamaki motegno gi bada ma korachwich ka atayi e yo makare.” Jehova tiyo gi weche mopogore opogore adek kojiwogo jotichne mondo obed gadier ni obiro sirogi. Otiyo gi ranyisi ma nyiso gima otimoga sama joge dwaro kony. Owacho ni sama ng’ato olwar, orie bade ma korachwich mondo ogole e chandruok.​—Isaya 41:13.

 Yo maduong’ ma Nyasaye tegogo kendo sirogo joge en kokalo kuom Wachne ma ne Muma. (Joshua 1:8; Jo-Hibrania 4:12) Kuom ranyisi, Wach Nyasaye oting’o rieko ma nyalo konyo joma nyagore gi chandruoge kaka dhier, tuo, kata joma olalo osiepegi kata wedegi e tho. (Ngeche 2:6, 7) Nyasaye nyalo tiyo bende gi roho mare maler ma en tekone mondo okony jotichne nano e bwo tem moro.​—Isaya 40:29; Luka 11:13.

 Weche ma yudore e ndikoni nohoyo chuny Jo-Yahudi ma bang’e noter e tuech Babulon. Jehova nokoro chon kotiyo gi jonabine ni e giko ngima mar Jo-Yahudi ka gin e tuech, ripode ne dhi wuok ni nitie jaloch moro ma ratego ma ne dhi kedo gi Babulon kod ogendni molwore. (Isaya 41:2-4; 44:1-4) Kata obedo ni Jo-Babulon kod ogendnigo ne dhi tetni gi luoro nikech jalno, Jo-Yahudi to ne ok onego obed maluor nikech Jehova ne dhi ritogi. Nosingonegi nyadidek ni ‘kik giluor.’​—Isaya 41:5, 6, 10, 13, 14.

 Kata obedo ni weche ma nondik e Isaya 41:10 nondik ne Jo-Yahudi ma ne ni e tuech Babulon, Jehova noneno ni wechego orit maber mondo oho jotichne duto. (Isaya 40:8; Jo-Rumi 15:4) Jehova konyo jotichne ma kindegi mana kaka nokonyo jotichne machon.