LERO TIEND NDIKO MAG MUMA

Isaya 42:8—“An e Ruoth”

TUGE

“An Jehova. Mano e nyinga; ok anami ng’ato ang’ata duong’na, ok anayie sanamu oyud pakna.”—Isaya 42:8, Loko mar Piny Manyien.

“An e Ruoth Nyasaye, kendo mano e nyinga. Ok ayie mondo duong’ ma imiya omi nyasaye moro machielo, bende ok ayie mondo pak mipakago opakgo gik mopa.”—Isaya 42:8, The Bible in Luo, 1976.

Tiend Ndiko mar Isaya 42:8

Nyasaye nyisowa nyinge, kendo owacho ni ok onyal yie mondo duong’ kod pak monego omiye odhi ne nyiseche manono.

Nyasaye e ma nomiyore nyingno, kendo ilokega e Dho-Luo ni “Jehova.” a (Wuok 3:14, 15) Kata obedo ni nyingno yudore chiegni nyadi 7,000 kama e Muma Machon (Ndiko mag Dho-Hibrania gi Aram), loko mang’eny mag Muma osewilo nyingno gi nyinge mar telo ma en “Ruoth” (e nyukta madongo). Kuom ranyisi, ne ane kaka olok Zaburi 110:1 ma nokoro weche moko e wi Jehova gi Yesu. E loko mar The Bible in Luo, 1976 wacho kama: “Ruoth Nyasaye [Jehova] ne owacho ni ruodha niya [Yesu].” (Tich Joote 2:34-36) Loko mar Piny Manyien to ogolo chochni ma nyalo betie e wi Ruodhi ariyogo nikech oduoko nying Nyasaye kama nosegolee. Owacho kama: “Jehova nowacho ne Ruodha niya: ‘Bed e bada korachwich nyaka chop aket wasiki obed raten tiendi.’”

Josomo mang’eny wacho ni nyingno tiende en “Omiyo Gima Odwaro Timore.” Nyasaye madier kende e ma owinjore oluong gi nyingno, nikech en kende e ma onyalo bedo gimoro amora, kata onyalo miyo chuechne obed gimoro amora mondo ochop dwache.

Dwarore ni walam Jehova kende nikech en e Jachuechwa kendo Nyasaye madier. Ok onego walam gimoro amora machielo, gibed sanamu kata gik mopa.—Wuok 20:2-6; 34:14; 1 Johana 5:21.

Weche Molworo Ndiko mar Isaya 42:8

E wes mokwongo okwongo mag bug Isaya sula 42, Jehova nokoro tich ma ‘jal ma oyiero’ ne dhi timo. Jal ma Nyasaye oyiegono ne dhi “kelo tim makare ne ogendni.” (Isaya 42:1) Nyasaye nowacho kama ka ne owuoyo e wi singono: “Koro alandonu gik manyien. Anyisougi kata ka pok gitimore.” (Isaya 42:9) Weche ma nokor e wi ‘jal ma noyier’ nochopo kare higni mang’eny bang’e ka ne Mesia kata Kristo obiro e piny mondo otim dwach Nyasaye.—Mathayo 3:16, 17; 12:15-21.

Kaka Mumbni Mamoko Oloko Isaya 42:8

“An Jehova, mano e nyinga; kendo duong’na ok anami gimachielo, kata pakna ok anami gik mopa.”—The ‘Holy Scriptures,’ by J. N. Darby.

“An Jehova; mano e Nyinga; kendo ok anami Duong’na ng’ato ang’ata, Pakna be ok anami gik mopa.”—A Literal Translation of the Bible.

a E Dho-Hibrania, nying Nyasaye ne indiko gi nyukta ang’wen ma kolok e Dho-Luo to gin YHWH. Mumbni moko lokoga nyingno ni “Yahweh.” Mondo iyud weche momedore, ne wich ma wacho ni, “Nying Nyasaye e Ndiko mag Dho-Hibrania” ma yudore e Apendiks A4 e Muma mar Loko mar Piny Manyien.