LERO TIEND NDIKO MAG MUMA
Jeremia 29:11—“An Awuon Ema Ang’eyo Gima Achanonu”
“‘Nimar an awuon ang’eyo gima aparo kuomu,’ Jehova a owacho, ‘adwaro ni ubed gi kuwe to ok masira, mondo amiu gima unyalo geno bang’e.’”—Jeremia 29:11, Loko mar Piny Manyien.
“An awuon ema ang’eyo gima achanonu. En gima ber, to ok gima rach, kendo abiro kelonu gik mabeyo duto mugeno. An e Ruoth Nyasaye ema awacho kamano.”—Jeremia 29:11, The Bible in Luo, 1976.
Tiend Ndiko mar Jeremia 29:11
Jehova Nyasaye nosingo ne jotichne ni gibiro bedo gi kuwe e kinde ma biro. Kata obedo ni wechego ne ondik ne jotich Nyasaye machon, pod ginyiso paro ma Nyasaye nigo kuom jotichne duto. En e “Nyasaye ma chiwo geno.” (Jo-Rumi 15:13) Singo kaka mago ne ondik e Muma mondo wan bende “wabed gi geno” mar kinde ma biro.—Jo-Rumi 15:4.
Weche Molworo Ndiko mar Jeremia 29:11
Wechego ne gin moko kuom weche ma ne ni e barua ma nondik ne Jo-Israel ma nogol Jerusalem moter e tuech e piny Babulon. b (Jeremia 29:1) Nyasaye nonyiso Jo-Israel ma noter e tuechgo ni ne idhi tuegi kuom kinde malach, kendo nonyisogi ni giger udi, gipidh puothe, kendo ginyuol nyithindo e pinyno. (Jeremia 29:4-9) Kata kamano, Nyasaye nomedo wachonegi niya: “Bang’ higni 70 e piny Babulon, abiro parou mi anaduoku e pinyu [Jerusalem] mondo achopgo singona.” (Jeremia 29:10) Omiyo, Nyasaye nosingonegi ni wiye ne ok dhi wil kodgi, kendo ni chieng’ moro ne gidhi dok thurgi.—Jeremia 31:16, 17.
Nyasaye nochopo singo ma nomiyo Jo-Israelgo. Mana kaka nokoro, Kuros ruodh Jo-Persia ne omonjo Babulon mi oloye. (Isaya 45:1, 2; Jeremia 51:30-32) Bang’ mano, Kuros nogonyo Jo-Yahudi mondo gidog thurgi. Gikone ne gidok Jerusalem, bang’ bedo e tuech kuom higni 70.—2 Weche mag Ndalo 36:20-23; Ezra 3:1.
Ka waneno kaka weche ma nokor e Jeremia 29:11 nochopo, wan bende wabedo gadier ni gik ma Nyasaye osingonwa biro chopo kare. Achiel kuom singogo en kuwe madier ma Yesu Kristo ma sani e Ruoth e Pinyruodh Nyasaye biro kelo e piny duto.—Zaburi 37:10, 11, 29; Isaya 55:11; Mathayo 6:10.
Paro ma Ok Kare ma Jomoko Nigo e Wi Jeremia 29:11
Paro ma ok kare: Nyasaye ‘osechano’ ne ng’ato ka ng’ato gik ma biro timore e ngimane.
Adiera: Nyasaye oweyo mondo ng’ato ka ng’ato oyier kaka obiro tiyo gi ngimane. Weche ma yudore e Jeremia 29:11 gin weche ma Nyasaye nowacho ne oganda duto mar Jo-Israel ma ne ni Babulon, kendo wechego nyiso ni Nyasaye ne dwaro ni ogandano obed gi kuwe e kinde ma biro. (Jeremia 29:4) Kata kamano, Nyasaye nomiyo ng’ato ka ng’ato e ogandano thuolo mar yiero ka be gibiro geno kuom singono kata ooyo. (Rapar mar Chik 30:19, 20; Jeremia 29:32) Jo-Israel ma nodwaro Nyasaye, nolame gi chunygi duto.—Jeremia 29:12, 13.
Paro ma ok kare: Nyasaye biro guedho jotichne kuom miyogi mwandu mang’eny.
Adiera: Wach motigo e Jeremia 29:11 ni “gik mabeyo” e Mumbni moko, olok koa e dho Hibrania ma tiende en “kuwe, kod ngima maber.” Ka luwore gi weche molworo ndikono, Nyasaye nosingo ne Jo-Israel ma ne ni e tuechgo kuwe kod ngima maber, to ok mwandu. Ogandano ne ok dhi lal ngang’, kar mano, ne gidhi dok Jerusalem chieng’ moro.—Jeremia 29:4-10.
Som Jeremia sula 29 kaachiel gi weche moler piny e wesgo kod ndiko mamoko ma otenore kodgi.
a Jehova en nying Nyasaye.—Zaburi 83:18.
b Buk miluongo ni The Expositor’s Bible Commentary wacho kama e wi Jeremia 29:11: “Mae en achiel kuom singo mabeyo ma wayudo e Ndiko ma nyiso kaka Yahweh [Jehova] ne odewo gadier joma noter e tuech, kendo kaka nomiyogi geno madier mondo kik chunygi jogi.”—Volume 7, ite mar 360.
Samoro Inyalo Hero Magi Bende
ESSENTIAL BIBLE TEACHINGS
Pinyruodh Nyasaye En Ang’o?
Kinde duto ma Yesu ne yalo, nojapuonjo ji wach Pinyruodh Nyasaye nyading’eny moloyo wach moro amora. Ji osebedo kalemo kuom higni mang’eny mondo pinyruodhno obi.
PUONJ MAG MUMA
Gik Mipuonjruokgo Muma
Yier gige puonjruok ma miyo puonjruok bedoni mayot kendo mamit.
