LERO TIEND NDIKO MAG MUMA

Jo-Rumi 10:13—“Luongo Nying Ruoth”

TUGE

“Ng’at ma luongo nying Jehova ibiro resi.”—Jo-Rumi 10:13, Loko mar Piny Manyien.

“Ng’ato ka ng’ato ma luongo nying Ruoth, norese.”—Jo-Rumi 10:13, The Bible in Luo, 1968.

Tiend Ndiko mar Jo-Rumi 10:13

Nyasaye ok buon ji, to nikech mano, omiyo ji duto thuolo mar yudo warruok kod ngima ma nyaka chieng’, bed ni giwuok e piny mane, oganda mane, gidhier, kata gimewo. Kata kamano, mondo wayud guethgo, nyaka waluong nying Nyasaye Manyalo Duto ma en Jehova. a—Zaburi 83:18.

E Muma, “luongo nying Jehova” oriwo gik mathoth, to ok mana ng’eyo nying Nyasaye kod tiyo kod nyingno e lamo kende. (Zaburi 116:12-14) Oriwo keto geno kuom Nyasaye, kendo bedo gadier ni en e ma onyalo konyowa.—Zaburi 20:7; 99:6.

Yesu nokawo nying Nyasaye kaka gima duong’ ahinya. Weche ma notiyogo kochako alam mar Ruodhwa nyiso mano. Wechego wacho kama: “Wuonwa manie polo, nyingi mondo obed maler.” (Mathayo 6:9) Bende, Yesu nowacho ni mondo wayud ngima mochwere, nyaka wang’e Wuon nyingno, wawinje, kendo wahere.—Johana 17:3, 6, 26.

Ang’o momiyo wanyalo wacho ni Jehova e “Ruoth” miwuoyo kuome e Jo-Rumi 10:13 e Muma mar The Bible in Luo, 1968? Mano en nikech ndikoni wacho weche ma yudore e Joel 2:32, kama jondiko notiyoe gi nying Jehova to ok nyinge mar telo ma en Ruoth. Weche ma ni e bug Joelno, ne okwong ndik gi dho Hibrania. b

Weche Molworo Ndiko mar Jo-Rumi 10:13

E Jo-Rumi sula 10, Muma nyiso ni mondo ng’ato obed gi winjruok maber gi Nyasaye, nyaka oyie kuom Yesu Kristo. (Jo-Rumi 10:9) Ma en paro misiro gi ndiko mang’eny mogol e Muma Machon. Ng’ato nyiso ni en gi yie ka ‘ohulo yiene e lela,’ kendo mano oriwo lando wach maber mar warruok ne joma pok oyie. Timo kamano miyo jomamoko thuolo mar bedo gi yie mabiro miyo giyud ngima ma nyaka chieng’.—Jo-Rumi 10:10, 14, 15, 17.

Som Jo-Rumi sula 10 kaachiel gi weche moler piny e wesgo kod ndiko mamoko ma otenore kodgi.

a Nying Nyasaye yudore kuonde mokalo 7,000 e kitepe machon mag Muma. E dho Hibrania, indiko nying Nyasaye gi nyukta ang’wen miluongo ni Tetragrammaton. E Dholuo, nyingno en “Jehova,” kata kamano, josomo moko to ohero tiyo gi “Yahweh.”

b Nenore ni joma nondiko Ndiko mag Dho-Grik notiyo gi nying Jehova ka ne giwuoyo kuom weche ma ne yudore e “Muma Machon.” The Anchor Bible Dictionary wacho kama: “Ka ne okwong ndik buge mag Muma Manyien, nitie gik ma nyiso ni Tetragrammaton, mochung’ ne Nying Nyasaye, tiende ni Yahweh, ne yudore kuonde moko, kata kuonde duto ma nogolie weche ma ni e Muma Machon kitiyo kodgi e Muma Manyien.” (Volume 6, ite mar 392) Mondo iyud weche momedore, som sula ma wacho ni “Nying Nyasaye e Ndiko mag Dho-Grik mag Jokristo” e Apendiks mar A5 e Muma mar Loko mar Piny Manyien. Bende, Apendiks C2 e New World Translation of the Holy Scriptures mar puonjruok (study edition) nigi list moting’o nyingno kaka oti kode e Mumbni mopogore opogore e Jo-Rumi 10:13.