“Gen Jehova gi chunyi duto, kendo kik igen kuom riekoni iwuon. Gen kuome e yoreni duto, eka enomi yoreni oriere tir.”​—Ngeche 3:5, 6, Loko mar Piny Manyien.

 “Gen kuom Ruoth Nyasaye gi chunyi duto, to kik igen kuom riekoni iwuon. Par Ruoth Nyasaye e gik moko duto mitimo, eka obiro nyisi yo makare monego iluw.”​—Ngeche 3:5, 6, The Bible in Luo, 1976.

 Onego wawe mondo Jehova a Nyasaye otawa sama watimo yiero madongo e ngima, kar geno kuom riekowa wawegi.

 “Gen Jehova gi chunyi duto.” Wanyiso ni wageno Nyasaye ka watimo gik moko kaluwore gi dwache. Nyaka wagen Nyasaye gi chunywa duto. E Muma, itiyoga gi chuny kiwuoyo e wi kaka ng’ato chalo kod kite ma iye, to mano oriwo paro ma en-go, kaka owinjo, kod kaka oneno gik moko. Omiyo, geno kuom Nyasaye gi chunywa duto ok en mana kaka wawinjo e chunywa kende. En yiero ma watimo nikech wan gadier ni Jachuechwa ong’eyo gik ma nyalo konyowa.​—Jo-Rumi 12:1.

 “Kik igen kuom riekoni iwuon.” Onego wagen kuom Nyasaye kinde duto nikech pachwa orem. Ka wagenore wawegi, wanyalo timo yiero moko ma nyalo nenore ni beyo, to bang’e ginyalo mana kelonwa hinyruok. (Ngeche 14:12; Jeremia 17:9) Rieko mar Nyasaye ni malo moloyo marwa. (Isaya 55:8, 9) Ngimawa biro dhi maber ka wayie mondo otawa.​—Zaburi 1:1-3; Ngeche 2:6-9; 16:20.

 “Gen kuome e yoreni duto.” Onego wanon paro ma Nyasaye nigo e gik moko duto ma watimo e ngimawa, kata e yiero moro amora ma watimo. Watimo kamano ka wakwaye mondo otawa kendo ka waluwo kaka ochikowa kotiyo gi Muma.​—Zaburi 25:4; 2 Timotheo 3:16, 17.

 “Enomi yoreni oriere tir.” Nyasaye miyo yorewa riere tir sama okonyowa dak kaluwore gi chikene makare. (Ngeche 11:5) Mano konyowa geng’o lit mang’eny kendo miyo wabedo mamor e ngima.​—Zaburi 19:7, 8; Isaya 48:17, 18.

 Bug Ngeche oting’o puonj mabeyo ma nyalo konyowa mondo wadag e ngima maber kendo ma moro Nyasaye. Sula ochiko mokwongo oting’o paro mabeyo ma wuoro miyo wuode mohero. Sula mar 3 wuoyo e wi ber ma wayudo sama watiyo gi rieko ma Jachuechwa miyowa.​—Ngeche 3:13-26.