“Yud mor maduong’ kuom Jehova, to obiro miyi gik moko duto ma chunyi gombo.”​—Zaburi 37:4, Loko mar Piny Manyien.

 “Onego iyud mor mana kuom Ruoth Nyasaye, eka omiyi gik ma idwaro.”​—Zaburi 37:4, The Bible in Luo, 1976.

 Jandik-zaburi jiwo joma lamo Nyasaye ni ginyalo bedo mamor ka gin gi winjruok maber gi Nyasaye. Ji duto ma nigi winjruok ma kamano gi Jehova a nyalo bedo gadier chuth ni obiro chopo gombogi.

 “Yud mor maduong’ kuom Jehova.” Wechego bende inyalo lok ni “bed mamor asasa kuom Jehova,” “yud mor sama itiyo ne Ruoth Nyasaye,” kata “bed mamor gi gima Ruoth osesingo.” E yo machuok, onego wayud “mor maduong’” kuom lamo Nyasaye madier. (Zaburi 37:4) Ang’o momiyo wawacho kamano?

 Joma lamo Jehova neno gik moko kaka onenogi, mana kaka ileronwa e Muma. Ging’eyo Nyasaye kendo ging’eyo ni luwo chikene en gima nyiso rieko. Mano miyo gisiko ka gin gi chuny maler kendo tang’ gi gik maricho ma nyalo hinyogi kod yiero maricho. (Ngeche 3:5, 6) Kuom ranyisi, igi ok wang’ kata bedo gi nyiego sama weche dhi maber ne joma richo kendo mohero mibadhi. (Zaburi 37:1, 7-9) Jotich Nyasaye mor nikech ging’eyo ni machiegnini, obiro tieko gik maricho duto kendo guedho joma beyo ma omakore kode. (Zaburi 37:34) Bende, gimor ahinya nikech ging’eyo ni Wuon-gi manie polo oyie kodgi.​—Zaburi 5:12; Ngeche 27:11.

 “Obiro miyi gik moko duto ma chunyi gombo.” Wechegi bende inyalo lok ni “obiro dwoko lamogi” kata “obiro miyi gik ma idwaro.” Mano koro ok nyis ni Jehova biro miyowa gimoro amora ma wakwaye. Mana kaka janyuol maber, Jehova ong’eyo gik ma nyithinde dwaro. E wi mano, gik ma wakwayo e lamo kod kit ngimawa nyaka luwre gi chike Nyasaye kod dwache. (Ngeche 28:9; Jakobo 4:3; 1 Johana 5:14) Ka watimo kamano, wanyalo wuoyo gi “Jawinj lamo” ka wan gadier ni obiro winjowa.​—Zaburi 65:2; Mathayo 21:22.

 Ruoth Daudi e ma nondiko Zaburi 37. Nondiko zaburino e yo mochanore maber, ka luwore gi kaka nyukta mag alfabet opangore. b

 Ne otimne Daudi gik maricho mang’eny. Noringo Ruoth Saulo kod jomamoko ma ne dwaro nege. (2 Samuel 22:1) Kata kamano, Daudi ne ogeno kuom Nyasaye kinde duto. Daudi nong’eyo ni gikone, Jehova ne dhi kumo jo maricho. (Zaburi 37:10, 11) Kata ka nenore ni gidhi maber mana ka “oboke mang’ich,” gikone gibiro lal nono.​—Zaburi 37:2, 20, 35, 36.

 Zaburi 37 nyiso pogruok ma nitie e kind gik ma biro timore ne joma luwo chike Nyasaye kod joma ok luw chikego. (Zaburi 37:16, 17, 21, 22, 27, 28) Kuom mano, zaburino konyowa yudo rieko kendo bedo joma Nyasaye oyiego.

 Ne vidio machuokni ma nyiso weche ma yudore e bug Zaburi.