Muma ok riw lwedo nyasi mar Ista. Ka inono histori mar Ista, ibiro fwenyo ni nowuok kuom nyasi midhialogo nyalo mar nyuol. Par ane weche ma luwogi.

1. Nying: Encyclopædia Britannica wacho kama: “Ok ong’ere ni nying ma Kisungu luongo ni Easter nochakore nade; e higni mag 1700, jadolo miluongo ni Venerable Bede, nogolo nyingno kuom nyasaye ma dhako mar ndalo chwiri mar Jo-German miluongo ni Eostre.” Buge moko tudo nyingno gi Astarte, ma en nyasaye ma dhako mar nyuol mar Jo-Foinike ma Jo-Babulon luongo ni Ishtar.

2. Apuoyo: En ranyisi mar nyuol “ma ne itiyogago chon e nyasi mag chwiri mag joma lamo nyiseche ma nono e pinje mag Ulaya kod Middle East.”​—Encyclopædia Britannica.

3. Tong’: Kaluwore gi buk miluongo ni Funk & Wagnalls Standard Dictionary of Folklore, Mythology and Legend, manyo tong’ mag Ista ma jomoko wacho ni ne ikeloga gi apuoyo mar Ista, “ok en aena tuk nyithindo, to ne en achiel kuom gik ma ne itimoga e nyasi mar nyalo mar nyuol.” Ogendni moko oyie ni tong’ mar Ista ma ne iwiroga gi rangi “nigi nyalo mar kelo mor e yor hono, mwandu, ngima maber, kod arita maber.”​—Traditional Festivals.

4. Lewni manyien mag Ista: Kaluwore gi The Giant Book of Superstitions, “ne en tim ma nyiso achaya kendo ma nyalo kelo hawi marach ka ng’ato ne odhi moso nyasaye madhako mar Jo-Scandinavia kata Eastre, ka ok orwako law manyien.”

5. Lamo mitimo sama wang’ chieng’ wuok: Otudore gi nyasi ma ne itimo gi joma lamo wang’ chieng’ ‘e chakruok mar chwiri e kinde ma bor mar odiechieng’ ne romre gi otieno. Ne itimo nyasino mondo orwakgo wang’ chieng’ kod tekone maduong’ mar chiwo ngima ne gik moko duto.’​—Celebrations​—The Complete Book of American Holidays.

Buk miluongo ni The American Book of Days nyiso maler kaka Ista nochakore: “Onge kiawa ni Kanisa machon, ne okawo nyasi mag joma ne lamo nyiseche manono, kae to gilokogi mondo gibed mag Jokristo.”

Muma siemowa ni ok onego walam Nyasaye ka waluwo timbe kata chike mag dhano ma ok more. (Mariko 7:6-8) Jo-Korintho mar ariyo sula mar 6:17 wacho kama: “Jehova owacho niya: . . . . ‘pogreuru kodgi, kendo weuru mulo gima ok ler.’” Ista en nyasi ma ne itimo gi joma lamo nyiseche manono kendo joma dwaro moro Nyasaye nyaka were gi nyasino.