Nyasaye ok e ma kel masiche matimore e kindegi, kata kamano, odewo ahinya joma oyudo masichego. Masiche matimore apoya en achiel kuom chandruoge ma Pinyruodh Nyasaye biro tieko. To gie kindegi, Nyasaye chiwo hoch ne joma oyudo masichego.​—2 Jo-Korintho 1:3.

•  Ang’o momiyo wanyalo bedo gadier ni masiche matimore apoya ok gin kum mowuok kuom Nyasaye?

•  Be masiche matimore apoya nyiso ni wadak e ndalo mag giko?

•  Ere kaka Nyasaye konyo joma oyudo masiche matimore apoya?

•  Be puonj mag Muma nyalo konyowa ikore ne masiche matimore apoya?

•  Ndiko ma hoyo joma oyudo masiche matimore apoya

Masiche matimore apoya opogore ahinya kod masiche ma Nyasaye notiyogo e kelo kum mondik e Muma.

• Masiche matimore apoya nego kata hinyo ng’ato ang’ata. Kata kamano, masiche ma ne Nyasaye otiyogo e kumo ji ne tieko mana joma richo. Kuom ranyisi, ka ne Nyasaye oketho taonde mag Sodom gi Gomora, noreso Lut kod nyige ariyo. (Chakruok 19:29, 30) Nyasaye ne onono chuny joma nodak e kindego kendo noketho mana joma richo kende.​—Chakruok 18:23-32; 1 Samuel 16:7.

• Masiche matimore apoya kinde mang’eny timore ka ji ok ong’eyo. Kata kamano, Nyasaye to nochiwo siem ne joma richo ka ne pok okumogi gi masiche. Joma nowinjo siem moloko yoregi ne otony e masichego.​—Chakruok 7:1-5; Mathayo 24:38, 39.

• Dhano bende osemiyo masichego otimore e okang’ moro. E yo mane? Gitimo kamano ka giketho alwora kendo gedo kuonde ma piny yiengnie mang’eny, kuonde ma ohula ng’enyie, kata kuonde ma kor lwasi richoe ahinya. (Fweny 11:18) Sama dhano otimo kamano, ok onego giket ketho kuom Nyasaye.​—Ngeche 19:3.

Ee, weche ma nokor e Muma nyiso maler ni masiche ne dhi betie e “giko mar ndalo,” kata “ndalo mag giko.” (Mathayo 24:3; 2 Timotheo 3:1) Kuom ranyisi, Yesu nowuoyo e wi kindewagi ka nowacho niya: “Chiemo nobed manok kendo yiengni mag piny nobedie kamoro bang’ machielo.” (Mathayo 24:7) Machiegnini, Nyasaye biro golo gik moko duto ma kelonwa lit kod chandruok, moriwo nyaka masiche matimore apoya.​—Fweny 21:3, 4.

• Nyasaye hoyogi kotiyo gi Muma. Muma singonwa ni Nyasaye dewowa kendo owinjo malit sama wachandore. (Isaya 63:9; 1 Petro 5:6, 7) Muma bende miyowa geno ni e kinde mabiro masiche matimore apoya ok nobedie kendo.​—Som kama wacho ni, “ Ndiko ma hoyo joma oyudo masiche matimore apoya.”

• Nyasaye tiyo gi jotichne e konyo joma oyudo masira. Nyasaye chiwo hoch kokalo kuom jotichne manie piny, ma luwo ranyisi ma ne Yesu oketo. Ne okor chon ni Yesu ne dhi hoyo “chuny jo monyosore” kod “chuny jo mokuyo.” (Isaya 61:1, 2) Jotich Nyasaye bende temo ahinya mondo gitim kamano.​—Johana 13:15.

  Nyasaye bende tiyo gi jotichne e chiwo gik ma dwarore e ngima mapile ne joma oyudo masiche.​—Tich Joote 11:28-30; Jo-Galatia 6:10.

Ee. Kata obedo ni Muma ne ok ondik mondo oikwa ne masiche matimore apoya, oting’o puonj ma nyalo konyowa. Kuom ranyisi:

• Ikri chon ne masira moro amora ma nyalo timore. Muma wacho ni: “Ng’at mariek neno masira ka biro kendo opondo”. (Ngeche 22:3) En gima nyiso rieko ka wachano motelo gima wanyalo timo sama wayudo masira moro. Ikruok ma kamano nyalo dwaro ni wabed gi bag moro ma wakanoe gik mochuno kendo ma nyalo bedo mayot ting’o, kata wuoyo gi joodwa e wi kama wanyalo dhiye sama masira otimore.

• ne ngima kaka gima duong’ moloyo mwandu. Muma wacho niya: “Ne ok wabiro gi gimoro amora e piny, kendo ok wabi a gi gimoro amora.” (1 Timotheo 6:7, 8) Nyaka wabed moikore weyo utewa kaachiel gi mwanduwa mondo kik masira moro ohinywa. Onego wapar ni ngimawa duong’ moloyo mwandu moro amora ma wan-go.​—Mathayo 6:25.