Mikael ma bende dinde moko luongo ni “Mikael Jatakatifu,” en nying ma nomi Yesu ka pok nobiro e piny kod bang’ ka osedok e polo. * Mikael noyware gi Satan bang’ tho mar Musa kendo nokonyo malaika moro chopo ote Nyasaye ne janabi Daniel. (Daniel 10:13, 21; Juda 9) Tiend nying Mikael en ni “Ng’ano ma Chal gi Nyasaye?” Odak kaluwore gi nyingno nikech oriwo lwedo loch Nyasaye kendo okedo gi jowasigu ma kwedo loch Nyasaye.​—Daniel 12:1; Fweny 12:7.

Wane ane gimomiyo wanyalo wacho ni Yesu e malaika maduong’ miluongo ni Mikael.

• Mikael e “malaika maduong’.” (Juda 9) Nying mar “malaika maduong’,” ma tiende en “jatend malaike,” yudore diriyo kende e Muma. E ndikogo duto, iwuoyo kuom ng’ato achiel, manyiso ni malaika achiel kende e ma tiyo gi nyingno. Achiel kuom ndikogo wacho ni Yesu, ma en Ruodhwa ma osechier “biro lor koa e polo ka ogolo chik gi dwol maduong’, kod dwol mar malaika maduong’.” (1 Jo-Thesalonika 4:16) Yesu nigi “dwol mar malaika maduong’” nikech en e malaika maduong’ miluongo ni Mikael.

• Mikael chiko oganda lweny mar malaike. “Mikael gi malaikene ne okedo gi thuol mang’ongono” ma en Satan. (Fweny 12:7) Mikael nigi teko mang’eny ahinya e polo, to mano e momiyo iluonge ni “achiel kuom jotelo madongo moloyo” kendo ni “jatelo maduong’.” (Daniel 10:13, 21; 12:1) Jasomo molony e weche manie Muma Manyien, miluongo ni David E. Aune wacho ni, nyinge mipakogo Mikael nyiso ni en e “jatend oganda lweny mar malaike.”

  Muma wuoyo mana e wi ng’at achiel ma omi teko e wi oganda lweny mar malaike. Olero kaka ‘Ruoth Yesu biro fwenyore koa e polo ka en-gi malaikene ma nigi teko e mach ma liel, sa mochulo kuor.’ (2 Jo-Thesalonika 1:7, 8; Mathayo 16:27) Yesu “ne odhi e polo, kendo malaike, gi loje, kod telo, ne oket e bwo tekone.” (1 Petro 3:21, 22) Nyasaye ok nyal keto Yesu gi Mikael mondo giduto gibed jotend malaike nikech mano nyalo miyo ng’ato oked gi nyawadgi. Mano e momiyo wanyalo wacho ni Yesu gi Mikael en ng’ato achiel.

• Mikael “biro chung’” e “kinde chandruok marach.” (Daniel 12:1) E bug Daniel, wach motigo ni “biro chung’” kinde mang’eny itiyogo kiwuoyo kuom ruoth ma kawo okang’ moro makende. (Daniel 11:2-4, 21) Yesu Kristo miluongo ni “Wach Nyasaye,” biro kawo okang’ makende kaka “Ruodh ruodhi” mondo otiek jowasik Nyasaye duto kendo orit jo Nyasaye. (Fweny 19:11-16) Obiro timo kamano e kinde “masira maduong’ . . . ma pok ne otimore a chakruok piny.”​—Mathayo 24:21, 42.