Ee. Yesu ne temo wacho ni jolupne nyalo manyo thieth ka ne owacho ni “jo mangima ok dwar laktar, to jo matuo e ma dwaro.” (Mathayo 9:12) Kata obedo ni Muma ok en bug thieth, oting’o puonj ma nyalo tayo joma dwaro moro Nyasaye.

Penjo minyalo penjori

1. Be ang’eyo weche duto motudore gi thieth ma adwaro? Muma jiwowa ni wamany weche minyalo gen kar “yie gi gimoro amora.”​—Ngeche 14:15.

2. Be onego amany paro mamoko mopogore gi ma laktarna omiya? “Ka nitie jong’ad rieko mang’eny,” mano nyalo konyo to ahinya ahinya ka ihewori.​—Ngeche 15:22.

3. Be kit thiethno tuomore gi chik manie Muma ma wacho ni ‘wawere gi remo’?​—Tich Joote 15:20.

4. Be kit thiethno otudore gi timbe juok? Muma kwedo “timbe juok.” (Jo-Galatia 5:19-21) Mondo ing’e ka be kit thiethno otudore gi timbe juok, inyalo penjori penjo kaka:

• Be ng’at ma thiedha tiyo gi timbe juok?

• Be othiedha koparo ni atimo tim moro mowang’o i nyiseche kata ni jasika moro oira?

• Be ogolo misango kata otiyo gi gige juok sama oikona yath kata sama omiya yath?

5. Be adewo ngimana mokalo tong’? Muma nyisowa niya: “Timu mar bedo jo ma pachgi ni kare onego ong’ere ne ji duto.” (Jo-Filipi 4:5, weche moler piny.) Ka pachwa ni kare, mano biro konyowa mondo waket pachwa e “gik ma dwarore moloyo,” kaka weche mag chuny.​—Jo-Filipi 1:10; Mathayo 5:3.