Bedo Maler Tiende En Ang’o?
Dwoko ma Muma chiwo
Bedo maler tiende en bedo ma onge chilo moro amora. E dho Hibrania, wach motigo ni “maler” tiende en “keto tenge.” Omiyo, gima ‘ler’ en gima owal ne tich makende kata gima oyiedhi ne Nyasaye.
Nyasaye ler e okang’ ma malo ahinya. Muma wacho niya: “Onge ng’at maler kaka Jehova.” * (1 Samuel 2:2) Omiyo, Nyasaye e ma nigi ratiro mar keto chike manyalo miyo owach ni gimoro ler.
Wach motigo ni “maler” inyalo tigo kiwuoyo kuom gimoro amora motudore gi Nyasaye, to moloyo gik ma oket tenge mondo otigo e lamo. Kuom ranyisi, Muma wuoyo kuom:
Kuonde maler: Ka ne Musa ni machiegni gi yiend kudho moro ma liel, Nyasaye nonyise niya: “Ka michung’ieno en ka maler.”—Wuok 3:2-5.
Sawo maler: Jo-Israel ne lamo Jehova ka gitimo sewni ma ne iluongo ni “chokruoge maler.”—Tim Jo-Lawi 23:37.
Gik maler: Gik ma ne itiyogo e lamo Nyasaye e hekalu man Jerusalem niluongo ni “gik maler.” (1 Ruodhi 8:4) Gik malergo ne omi luor ahinya, kata kamano, ne ok onego olamgi. *
Be dhano morem nyalo bedo maler?
Ee. Nyasaye chiko Jokristo kama: “Nyaka ubed jo maler, nikech an aler.” (1 Petro 1:16) En adier ni, dhano morem ok nyal bedo maler e okang’ ma Nyasaye lergo. Kata kamano, inyalo wach ni joma luwo chike Nyasaye gin jo “maler kendo ma Nyasaye oyiego.” (Jo-Rumi 12:1) Ng’at ma temo mondo obed maler nyiso mano e wechene kod timbene. Kuom ranyisi, oluwo puonj manie Muma ma wacho ni “ubed maler kendo uweru gi terruok” kod ma wacho ni “beduru jo maler e timbeu duto.”—1 Jo-Thesalonika 4:3; 1 Petro 1:15.
Be ng’ato nyalo bedo ma ok ler e wang’ Nyasaye?
Ee. Ka ng’ato oweyo luwo chike Nyasaye ma dwaro ni wabed gi timbe mabeyo, Nyasaye ok kwane kaka ng’at maler. Kuom ranyisi, bug Jo-Hibrania nondik ne “jo maler,” to nomigi siem ni ginyalo ‘bedo gi chuny marach ma onge gi yie, ma miyo gisudo mabor kendo giweyo Nyasaye mangima.’—Jo-Hibrania 3:1, 12.
Miriambo ma ji wacho e wi bedo maler
Miriambo: Ng’ato nyalo bedo maler ka otuonore gik moko.
Adiera: Muma wacho ni “sando ringruok,” kata tuonruok, “gin gik ma ok kony” e wang’ Nyasaye. (Jo-Kolosai 2:23) Kar mano, Nyasaye dwaro ni wabed mamor gi gik mabeyo. Muma wacho niya: “Ji duto onego ochiem kendo ometh kendo obed mamor nikech tijgi matek. Mano en mich mowuok kuom Nyasaye.”—Eklesiastes 3:13.
Miriambo: Ng’ato bedo maler ka ok odonjo e kend kata e weche mag nindruok.
Adiera: Kata obedo ni Jakristo nyalo yiero ni ok odonj e kend, mano ok mi obed maler e wang’ Nyasaye. En adier ni joma ok odonjo e kend nyalo keto pachgi e weche mag lamo ma gimoro ok ochochogi. (1 Jo-Korintho 7:32-34) Kata kamano, Muma wacho ni kata mana joma odonjo e kend bende nyalo bedo maler. Kuom ranyisi, Petro ma ne en achiel kuom joote Yesu nokendo.—Mathayo 8:14; 1 Jo-Korintho 9:5.
^ par. 2 Jehova en nying Nyasaye. Mumbe mang’eny tudo nyingno gi “ler” kod “bedo maler.”
^ par. 6 Muma kwedo tim mar lamo sanamu.—1 Jo-Korintho 10:14.
Samoro Inyalo Hero Magi Bende
OHINGA MAR JARITO
Be Jotend Dinde mag Jokristo Onego Osik Maok Okendo?
Dinde mang’eny dwaro ni jotendgi osingre ni ok gibi kendo kata ok bi kendgi. Muma wacho ang’o e wi wachni?
WECHE E WIWA
Kwa Mondo Opuonji Muma Nono ma Onge Chudo
Yud puonjruok Muma ma onge chudo e sa mowinjore kodi kendo e kama ihero.