Yesu nowaro dhano ka ne ochiwo ngimane kaka misango. (Mathayo 20:28) Omiyo, Muma luongo Yesu ni “Jawar mar piny.” (1 Johana 4:14) Bende, Muma wacho niya: “Onge warruok kuom ng’at machielo, nimar onge nying machielo e bwo polo mosechiw ne ji mondo wayudie warruok.”​—Tich Joote 4:12.

Yesu ne ‘obilo tho ne ji duto’ moyie kuome. (Jo-Hibrania 2:9; Johana 3:16) Bang’ mano, “Nyasaye ne ochiere,” kendo Yesu nodok e polo kaka chuech mar roho. (Tich Joote 3:15) Ka en e polo, Yesu nigi nyalo “mar reso chuth jo ma sudo ir Nyasaye kokalo kuome, nimar ongima kinde duto mondo osanegi Nyasaye.”​—Jo-Hibrania 7:25.

Ang’o momiyo dwarore ni Yesu osanwa Nyasaye?

Waduto wan joricho. (Jo-Rumi 3:23) Richo pogowa gi Nyasaye kendo okelo tho. (Jo-Rumi 6:23) Kata kamano, Yesu en kaka ‘jal ma chung’ e bura’ ne joma nyiso yie kuom misango ma nochiwo. (1 Johana 2:1, weche moler piny) Osayonegi, kokwayo Nyasaye mondo owinj lamogi kendo owenegi richogi nikech noyie chiwo ngimane kaka misango. (Mathayo 1:21; Jo-Rumi 8:34) Nyasaye winjo kaka Yesu sayo ne ji nikech mano luwore gi dwache. Nyasaye nooro Yesu e piny “mondo ores piny kokalo kuome.”​—Johana 3:17.

Be yie kuom Yesu kende e gima dwarore mondo owarwa?

Ooyo. Kata obedo ni onego wayie kuom Yesu mondo owarwa, nitie gik mang’eny ma pod dwarore ni watim. (Tich Joote 16:30, 31) Muma wacho niya: “Mana kaka ringruok ma onge gi much ngima otho, e kaka yie ma onge gi tim bende otho.” (Jakobo 2:26) Mondo owarwa, nyaka watim gik ma luwogi:

• Wapuonjre e wi Yesu gi Wuon-gi ma en Jehova.​—Johana 17:3.

• Wayie kuomgi.​—Johana 12:44; 14:1.

• Wanyis ni wayie kuom-gi ka waluwo chikegi. (Luka 6:46; 1 Johana 2:17) Yesu nowacho ni ok ji duto ma luonge ni “Ruoth” ibiro resi, ‘to mana jo ma timo dwaro mar Wuon-gi manie polo.’​—Mathayo 7:21.

• Wadhi nyime nyiso yie motegno kata bed ni wayudo chandruoge. Yesu nolero wachno ayanga ka ne owacho niya: “Ng’at motimo kinda nyaka giko ibiro resi.”​—Mathayo 24:13.