Ang’o Momiyo Iluongo Yesu ni Wuod Nyasaye?

TUGE

Dwoko ma Muma chiwo

Kinde mang’eny, Muma luongo Yesu ni “Wuod Nyasaye.” (Johana 1:49) Weche motigo ni “Wuod Nyasaye” nyiso maler ni Nyasaye e Jachuech kata Soko mar ngima, to mano nyiso ni en e ma nochueyo Yesu be. (Zaburi 36:9; Fweny 4:11) Muma ok puonj ni Nyasaye nonyuolo Yesu, mana kaka dhano nyuolo nyithindo.

Muma bende luongo malaike ni “yawuot Nyasaye madier.” (Ayub 1:6) E wi mano, Adam ma ne en dhano mokwongo bende iluongo ni “wuod Nyasaye.” (Luka 3:38) Kata kamano, Muma wacho ni Yesu e Wuod Nyasaye makayo nikech en e ma Nyasaye nokwongo chueye kendo nochueye gi lwetene owuon.

Be Yesu nodak e polo ka ne pok onyuole e piny?

Ee. Yesu ne en chuech mar roho e polo ka ne pok onyuole kaka dhano e piny. Yesu owuon nowacho niya: “Asewuok e polo.”—Johana 6:38; 8:23.

Yesu e ma Nyasaye nokwongo chueyo kapok ochueyo gik mamoko duto. Muma wacho kama e wi Yesu:

“En e . . . jal makayo kuom chuech duto.”—Jo-Kolosai 1:15.
En e “chakruok mar chuech Nyasaye.”—Fweny 3:14.

Yesu nochopo weche ma nokor kuome ma wacho niya: “Kar chakruokne osebedoe nyaka nene, ee, chakre ndalo machon.”—Mika 5:2; Mathayo 2:4-6.

Ang’o ma Yesu ne timo e polo ka ne pok obiro e piny?

Ne en gi migawo maduong’ e polo. Yesu owuon nowuoyo kuom migawono kowacho niya: “Wuora, miya duong’ . . ., duong’ ma chal gi ma ne an-go e bathi ka ne piny pok obetie.”—Johana 17:5.

Nokonyo Wuon-gi chueyo gik mamoko duto. Yesu ne tiyo kanyachiel gi Nyasaye “kaka jatich molony.” (Ngeche 8:30) Muma wacho kama e wi Yesu: “Kokalo kuome, ne ochue gik mamoko duto manie polo gi manie piny.”—Jo-Kolosai 1:16.

Nyasaye notiyo gi Yesu e chueyo gik mamoko duto moriwo nyaka chueyo malaike kaachiel gi piny gi polo. (Fweny 5:11) Tudruok ma ne nie kind Nyasaye kaachiel gi Yesu inyalo pim gi manie kind ng’at ma goro udi kod fundi ma gedo. Fundi ma gedono biro gero ot mana kaka jagor udi ogore.

Ne en Wach. Muma luongo Yesu ni “Wach” sama owuoyo e wi kinde ma ne pok obiro e pinyka. (Johana 1:1) Mano nyiso maler ni Nyasaye ne tiyo gi Wuode e kowo otene ne chuech mamoko mag roho.

Bende, nyalo bedo ni Nyasaye notiyo gi Yesu e kowo ote ne dhano e piny. Samoro en e ma Nyasaye notiyo kode sama nowuoyo gi Adam kod Hawa e puodho mar Eden komiyogi chike monego giluw. (Chakruok 2:16, 17) Nyalo bedo ni Yesu e malaika ma notayo Jo-Israel e thim kendo en e ma nochiwo chike ma Jo-Israel ne nyaka luw.—Wuok 23:20-23. *

^ par. 12 Wach ok e malaika kende ma ne Jehova otiyogo e kowo ote. Kuom ranyisi, notiyo gi yawuote mamoko mag roho mondo omi Jo-Israel Chik ma nonego giluw.—Tich Joote 7:53; Jo-Galatia 3:19; Jo-Hibrania 2:2, 3.