Dandelion chîte hi boruakah an lêng darh nasa thei hle a. Thlîin a pâr a chhêm hian a chî te tak tê tê chu parachute ang maiin boruakah an lêng darh ta ṭhîn a. Lei nêna inhnaih tak aṭanga lêng ṭan ni mah se, kilometer khat (mêl 0.6) aia thui an lêng thei a ni. Engin nge chutianga reia boruaka lêng tûra ṭanpui? Tûn hnai lawk khân, mi thiamte chuan dandelion chîte boruaka lên dân chu parachute anga a chêt nasat loh bâkah, a lêt lî laiin chakna a hmang tlêm zâwk tih an hmu chhuak a ni.

 Han ngaihtuah teh: A chî tinte chuan kuang an nei a, a kuangte chu pappus tia koh, hmul sîn leh khauh tak hlâwm betin an awm a. Pappus-te chu parachute anga hna thawkin a chîte chu boruaka lêng thei tûrin an ṭanpui a ni.

 Mahse, pappus hnathawh ni lo, thil dang pawh a la awm a. Thlî chu chûng hmul khauh tak tak kâra a luh chuan rîn bial ang thli vir a chungah a rawn insiam a. Chu thli vir chuan pressure na lo tê siamin, dandelion chî chu boruakah a lêntîr ta a ni.

 A hmul khauh tak fel fai taka awmkhâwmte avângin, pappus chu parachute aia damin leh thli chakna hmang lutuk lovin a lêng thei a. Chu bâkah, a chhûnga hmun zaa sawmkua chu a ruak bawk! Chuvângin, boruaka lêng tûrin hmanrua a mamawh tam lo hle.

 Scientist-te chuan dandelion chî boruaka a lên dân chu kawng hrang hranga entawn an tum a. Kawng khat chu, chakna tlêm tê chauh mamawh drone tê chi siam chhuah a ni. Chûng drone-te chu boruak bawlhhlawhna en thlithlaina pawh tiamin, kawng hrang hranga hman ṭangkai theih a ni dâwn a ni.

 Engtin nge i ngaih? Dandelion chîte chakna tlêm tê chauh hmanga boruaka an lên dân chu amaha lo awm nge ni a, siam a ni zâwk?