Mi zai thiamte chuan inzainaa ṭanpuitu tûr leh taksa hliam dam leh tûra ṭanpui theitu damdawia hman chi thil chârna an mamawhna a rei tawh a. Tûn laia thil chârna an hman tam tak chu taksa chhûng lama hman atân a him tâwk lo a ni. Chûng thilte chu a hlauhawm a, hman a nih pawhin a hnuah a rawn khawng a, thil huh a châr bet thei lo. Scientist-te chuan hnapkhâwn a thil chârna hnâng an zirna aṭangin hêng harsatnate chinfel dân hi an hmu chhuak a ni.

 Ngaihtuah rawh: Hnapkhâwn hian thil hlauh a neih chuan thing hnah huha inchâr beh theihna khawpa ban thil hnâng a tichhuak thei a. Hei hian ṭha taka a vênhim rualin, duh duha che thei tûrin a siam a ni.

 Mi thiamte chuan hnapkhâwnin a tihchhuah thil hnâng an zir chianna aṭangin mihring siam chawp ni lo thil chârna ṭha tak ni tûra thil tel chi hrang hrang an hmu chhuak a. Entîr nân, he thil hnâng hian thil châr beh theihna bâwlhlo leh electric ang maia thil hîp theihna a hmang kawp a. A hnâng chuan hnapkhâwn inchâr behna chu tâwn tlangin a inchâr behtîr a, hlauh a neih hunah a fân leh a ni. Hnapkhâwn thil chârna entawna mi thiamte thil chârna siam chhuah chu damdawi lama hman tûr thil chârna awm mêk aiin a ṭha zâwk fê a, taksa pêng dam lai pawh nghet takin a châr thei a. “Taksa pêngte leh ruh chuktuah” zawm nân a hman tlâk tia sawi a ni bawk.

 Mi thiamte chuan he thil chârna hi mi zai thiamte hmanraw ṭangkai tak hliamte ṭhui leh chilh ngai lova awmtîrtu a nih theih an ring a ni. Ruh no thlâk nân, a nih loh leh taksa chhûnga duhna hmun taka damdawia inenkawlna hmanrua vuah nân a hman theih ang. He thil chârna hi vawk lung pawp hnawhphui nân leh sazu thin pawp bel nân hman chhin a ni tawh a, a ṭha hle tih finfiah a ni.

 Scientist-te chuan kan chhehvêla leilung pianken thilte an zirna aṭangin harsatna tlânglâwn takte chinfelna ṭha chungchuang an hmu chhuak ṭhîn a. Thil chârna siam chhuahna hmun pakhata director Donald Ingber-a chuan, “a zawnna tûr hmun hriat leh chutiang thil hmuh huna ngaihtuahna ṭha tak neih chu thil pawimawh tak a ni,” tiin a sawi.

 Engtin nge i ngaih? Hnapkhâwn thil chârna hnâng hi chanchhâwnna avânga lo awm nge ni a, siam a ni zâwk?