Thingkûnga awm chi Japanese uchang pate hi hrâm dân awmze nei lo tak anga langa an hrâm nawn fo avânga hriat hlawh an ni a. Chutih rualin, a huhova an hrâm hunah pawh uṭawk pa tinte chu thliar hran theih an ni. Chutiang a nih chhan chu, uchang nute an chhai hian inthurual taka an hrâm ṭhin vâng a ni tih Japan rama zir chîk mite chuan an hmu chhuak a ni.

 Ngaihtuah rawh: Thingkûnga awm chi Japanese uchang pate hian a nute hîp nân an hrâm ṭhîn a. An hrâm rî chuan an aw bâwm aṭanga an awr puar thei lai a thlen hian a chhûnga thang khâwkin ring takin a rawn chhuak ta ṭhîn a ni.

 Uchang pa tinte hrâm rî chu engtia hriat hran theih nge a nih? Awmze nei lova hrâm lovin, an bula uchang dangte nên indawt zêlin an hrâm ṭhîn tih zir chîk mite chuan an hmu chhuak a ni. Chutianga tihna chuan inhrâm thuah lo tûr leh tha chakna hmang tlêm zâwk si a fiah taka hrâm ṭheuh tûrin a ṭanpui a. Chu bâkah, chutianga inthurual taka an hrâm avângin chawlhna hun pawh an nei thei a ni.

 Hrui tel lova inbiak pawhna lam zir mite chuan uchangte inthurual taka an hrâm dân aṭangin chanchin (data) pakhat thawn ruala data dang amaha lo inthawn tel lo tûra thunun dân thiamna sâng tak an zir chhuak a. Chuvângin, chanchinte (data) chu him tak leh khâwl chakna pawh mamawh tam lutuk lova thawn chhuah theih a ni ta a ni.

 Engtin nge i ngaih? Thingkûnga awm chi Japanese uchangte inthurual taka an hrâm theihna hi chanchhâwnna avânga lo awm nge ni a, siam a ni zâwk?