Nau chhartute tâna siam lehkhabu pakhat chuan: “Naute tâna hnute tui siam chawpte chuan nu hnute tui a tluk thei tak tak ngai lo vang,” tiin a sawi a. Nu hnute tui chu naute mamawhte mila a taksain a siam danglam ṭhin avângin, naute tâna ṭha ber a ni.

 Ngaihtuah rawh: Nuin hnutê a pêk chhûngin hnute tui chu a inthlâk danglam ṭhîn a. Nautêin hnutê a hnêk ṭan chuan hnute tuiah protein, vitamin, mineral leh, tui tam tak a tel a ni; mahse, a hnêk tâwp lamah erawh chuan hriak a tam thung a, chu chuan nautê chu a tipuar a ni. Nu hnute tui chu naute kum zât leh sik leh sâ azirin a inthlâk danglam ṭhîn bawk.

 Zan lamah, hnute tuiah chuan melatonin ang chi mut tichhuak thei hormone tam tak a tel a, chhûn lamah chuan hormone dangte a tel tam ve thung. Hnute pêk hun azirin hnute tui chuan nautê chu a mut a tichhuak emaw, harhvâng takin emaw a awmtîr a, chu chuan mut hun leh harh hun mumal tak nei tûrin a ṭanpui a ni.

 Nuin nautê a hrin hnu ni rei lo te chhûngin a taksain colostrum tia koh hnute tui eng lampang hi a siam a. Chutah chuan chaw ṭha tam tak telin, pai a nuam a ni. Chuvângin, naute piang hlimin tlêm tê chauh a hnêk pawhin nasa takin a ṭhatpui a. Colostrum-ah chuan natna hrik laka nâusên vênghimtu natna dotu (antibody) pawimawh tam tak a tel bawk a. Chu bâkah, naute pumpui ṭhuah fai nân a daikaltîr thei bawk a ni.

 Nuin phîr a neih pawhin a taksain mamawh zât tûr mila hnute tui a siam chhuah theih avângin, lungngaihna tûr a awm lo.

 Engtin nge i ngaih? Nu hnute tui danglam tak chu chanchhâwnna avânga lo awm nge ni ang a, siam a ni zâwk?