Robot siamtu engineer-te chuan doctor-te’n dam lo taksa a tê thei ang bera an zai theih nân hmanraw chi khat an siam a. Chutiang an siam theih dân pakhat chu duh duha inthlep kual thei leh intifân thei octopus kut, a nih loh leh a bân an entawn vâng a ni.

 Ngaihtuah rawh: Octopus chuan duh duha inthlep kual thei leh tihfân theih a kut pariat hmangin hmun zîm takah pawh thil a manin a hmet sâwr thei a ni. Hêng a kut pariatte hi a duhna lam lamah a tihthlep theih mai bâkah, a châng tinah a tikhawng thei bawk.

 Mi thiamte chuan chutiang kut nêm leh duh duha inthlep kual thei robot kut chu awm se, a tê thei ang bera taksa an zai nân a ṭangkai hle ang tih an hria a. Chutiang hmanrua chuan dam lote chu inzaina khirh zâwk hmachhawn ngai lovin a siam thei ang.

 Duh duha inthlep kual thei leh intifân thei octopus kut chêt vêl dân en rawh

 Chutiang robot kut chu siam a ni tawh a, inzaina atân enchhinna anga hman a ni tawh bawk. Inzai laiin, a kut pakhat millimeter 135 (5 in.)-a sei chuan taksa chhûng lama a pêngte tichhe lova la kânga a chelh laiin, a dangin inzai hna a lo thawk thei a ni. Chu hmanraw siamnaa tel Dr. Tommaso Ranzani-a chuan, “he thil hi hmanraw changkâng takte hmahruaitu a nih kan ring tlat a ni,” tiin a sawi.

 Engtin nge i ngaih? Octopus kut hi chanchhâwnna avânga lo awm nge ni a, siam a ni zâwk?