Remora sangha hi tuifinriata nungcha danga nghet taka inhîp tâng thei leh a va inhîp tânna tina miah lova awlsam taka thlah leh thei a ni a. He a inhîp tân theihna hi mi thiamte’n an ngaihven hle.

 Ngaihtuah rawh: Remora sangha hi vun leh kâwr inang lo tak tak ray te, shark te, sumsî te, whale sangha te, leh tuifinriata nungcha dangteah amahin a inhîp tâng thei a. Thil nungtê zâwk leh a va inhîp tânna thil ei bângin a inchâwm a, chutih rualin tha sêng miah lovin a kal kual a, amah ei tumtute lakah a him bawk. Mi thiamte chuan remora sangha thil chi hrang hranga dîm tê, mahse nghet tak sia a inhîp tân theih dân hi hriat tumin a inhîpna, a nih loh leh a thil hîpna bial tung sâwl hi zir chianna an nei a ni.

 Whale shark sanghaa bet remora sanghate

 Remora sangha thil hîpna bial tungsâwl hi a tukhum lamah a awm a. He a hîpna pâwn lam kual hi chhah leh nêm tak a ni a, chu chuan nghet takin a inhîp tântîr reng thei a ni. A hîpna biala thil phêk thlûr awmah chuan zâng ruh fei leh te tak tê tê a awm a. Thil phêk thlûrte chu a rawn khawng chuan a chhûnga zâng ruh awmte chuan an va tânna tûr vun chu an va dek a, innawhna a awmtîr ta ṭhîn a ni. He inhîpna leh innawhna ṭangkawp hian a va inhîp tânna chu engtianga chaka kalin, leh a kalna lam thlâk thut mah se, remora sangha hi nghet takin a bet thei a ni.

 Remora sangha inhîp tânna bial tung sâwl hi entawnin scientist-te chuan siamchawp an duang chhuak a. Chu an thil siam bial tung sâwl deuh chu thil chi hrang hrangah a bet thei a ni. Mi thiamte’n han pawh thlâk leh an tum chuan, a hîp tânna tha chak lam lêt zaa tama chaka an pawh pawhin a tla thei miah lo!

 Remora sangha inhîp tân theihna entawnin hmanraw tam tak siam tûr a awm a. Chûngah chuan tuifinriata nungcha zirna atân te, tuifinriat thûk tak zir chianna atân te, leh tui chhûnga lei dawh leh lawngtea êng vuah beh theihna tûr hmanraw siamna atânte a tel a ni.

 Engtin nge i ngaih? Remora sangha inhîp tân theihna hi chanchhâwnna avânga lo awm nge ni a, siam a ni zâwk?