Sea cucumber-te hi tuipui mawng leh lung hmuna awm ṭhîn rannung an ni a. An vun pâwn lam chu a sakin, a nêmin, leh a zum thei a. A vun chu khawihnûn angin a tinêm thei a, second khat chhûng lekin thing angin a tisak thei bawk. Chutianga a intih danglam theih avângin lung keh kâr zîm takah a lût thei a, amah ei tumtute tâna pawh chhuah theih loh khawpin a intisak leh thei a ni. Sea cucumber-in hetianga a tih theih chhan chu a vun mak tak vâng hi a ni.

 Ngaihtuah rawh: Sea cucumber-te vun hian nih dân pathum—a sak, a pângngai, leh a nêm a nei a. Hetianga inthlâk danglam tûr hian a vuna thil zai sîn awmte a inzawmtîrin, a tichat a ni. Chu chu protein sak, a nih loh leh a nêm tichhuakin a ti ṭhîn.

 Protein sak chuan a vuna thil zai sînte chu zawm khâwmin a vun chu sak takin a siam a. Protein nêm erawh chuan chûng inzawm khâwmte chu tichatin a vun chu a tinêm ta ṭhîn a. Sea-cucumber vun chu tuiral mai tûr ang khawpin a nêm thei a ni.

 Scientist-te chuan he sea-cucumber vun anga dinhmun azira inthlâk danglam thei hmanruate siam an tum a. An siam tumte zînga pakhat chu thluak zainaa hman tûr electric kal tlang theihna khâwl, a hmun dik taka vuah theih tûra sak leh nêm thei siam hi a ni. Chutiang electric kal tlang theihna khâwl siam theih a nih chuan inzaina pawh a hlawhtling zâwk ngei a rinawm.

 Engtin nge i ngaih? Sea-cucumber vun danglam tak hi chanchhâwnna avânga lo awm nge ni a, siam a ni zâwk?