Zawhtê te hian an leiin an taksa an liak fai ṭhîn a. An mut loh hun chhûng 100-a 24 chu an hmul liah fai nân an hmang a. An lei hi danglam bîk taka siam a nih avângin anmahniin ṭha takin an intifai thei a ni.

 Ngaihtuah rawh: Zawhte lei hi kuttin ang vêla khawng leh pianze nei bawl te tak tê tê 290-in hnung lam hawi zâwngin a khuh chhuak vek a. Hêng bawl tintea khuar hi zawhte lei a kaa a luh leh rualin chilin a rawn khat leh ṭhîn. Zawhtêin a hmul a liah hian chûng bawl te tak tê tête chu a hmul kârah lût thlain a vunah a chil chu a zuk thleng ta ṭhîn a ni.

 Zawhte lei hian nî tin a vun leh a hmulah a chil milliliter 48 (1.6 oz) vêl a tât thei a. A chilah hian bawlhhlawh tihfai theihna a tel a ni. Chu bâkah, a chil a hul hian a taksa tivawt tûrin a ṭanpui a, thlan chhuahna tûr taksa pêng tlêm tê chauh a neih avângin hei hi zawhte tân a pawimawh hle.

 A lei bawl zînga pakhatin a hmul invêt hnawk lai a liah fuh chuan thûk lehzualin a hmulah a lût a, na zâwka liakin a hmula invêt hnawk lai chu a timâm ṭhîn. Zawhte leia bawl hian a hmul a liah fai rualin a vun pawh a tinung thei bawk. Mi thiamte’n zawhte lei entawnin samkhuih chi khat an siam chhin a. Chu samkhuih chu samkhuih pângngai aiin a khuih a nuam zâwk a, tihfai a awlsam zâwkin, sam a timâm thei a ni. Mi thiamte chuan zawhte lei entawnin sam leh thil hmul tihfaina tûr hmanrua an siam chhuah theih an ring a. Chu chu sam leh hmul ṭo tamna laia lotion emaw, damdawi lam chî emaw hnawihna atân pawh hman theih a ni ang.

 Engtin nge i ngaih? Zawhte lei hi chanchhâwnna avânga lo awm nge ni a, siam a ni zâwk?