“Bible hi chhiar ka tum ve ṭhin a; mahse, a chhah êm avângin ka huphurh lutuk!”—Briana-i, 15.

 Chutiang chuan i awm ve em? He thuziak hian a ṭanpui thei che!

•  Engvângin nge Bible i chhiar ang?

•  Engtin nge Bible ka chhiar ang?

•  I ṭhiante sawi chu

 Bible chhiar chu thil ninawm angin i ngai em? I ngai a nih chuan, chu chu a hriatthiamawm hle. Bible chu lehkhabu phêk sâng tam tak nei, hawrawp te tak tê têa khat, TV leh video-te anga a lem hmuh tûr awm lo a nih avângin ngaihven awm lo tak angin i ngai thei!

 Mahse, heti zâwng hian ngaihtuah rawh: Hmân lai ro bâwm lian tak hmu chhuak ta la, a chhûnga awmte hriat chu i châk dâwn lâwm ni?

 Bible hi chutiang ro bâwm chu a ni a. A chhûngah finna lunghlu tam tak a awm a. Chûngte chuan

•   Thu tlûkna ṭha siam tûr te

•   Nu leh pate nêna inlaichînna ṭha nei tûr te

•   Ṭhian ṭha ber nei thei tûr te leh

•   Rilru hahna hmachhawn thei tûrtein a ṭanpui thei che a ni.

 Engtin nge hmânlai lehkhabu chu tûn laiah chutiang taka a ṭangkai theih? “Pathian Lehkha Thu zawng zawng hi Pathian thâwk khuma pêk” a nih avângin. (2 Timothea 3:16) Chumi awmzia chu Bible-a thurâwnte hi thurâwn ṭha ber Petu hnên aṭanga lo chhuak tihna a ni.

 Bible chhiar theih dân kawng khat chu a tîr aṭanga a tâwp thleng chhiar a ni. Chu chuan Bible thuchah ken tlângpui a hriattîr ang che. Bible chhiar theih dân kawng tam tak a awm a. Entîrna pahnih lo ngaihtuah ta ila:

•    Bible bu 66-te hi Genesis aṭanga Thu Puan thleng a indawtin i chhiar thei.

•    Bible-a thilthlengte chu a thlen dân indawtin i chhiar thei.

 Thurâwn: New World Translation Appendix A7-ah leia Isua nuna thilthleng langsâr zualte chu a indawta târ lan a ni.

 Bible chhiar theih dân kawng hnihna chu harsatna i hmachhawn mêk nêna inkûngkaih thu thlan a ni. Entîr nân:

•   Ṭhian rinawm takte neih i duh em? Jonathana leh Davida chanchin chhiar la. (1 Samuela, bung 18-20) Tichuan, an chanchin aṭanga zir tûr ṭhate hriat nân, “Ṭhian Rinawm Neih Theih Dân” tih worksheet chu hmang ang che.

•   Thlêmna do thei tûra chak lehzual i duh em? Josefa’n thlêmna a do hneh dân chanchin chhiar la. (Genesis, bung 39) Tichuan, a chanchin aṭanga zir tûr ṭha hriat nân, “Thlêmna Do Dân . . . Josefa—Ṭhen 1” tih leh “Dik Lo Taka Puh A Ni! Josefa—Ṭhen 2” tih worksheet chu hmang ang che.

•   Ṭawngṭainain a ṭanpui theih dân che zir i duh em? Nehemia thiltawn chhiar la. (Nehemia, bung 2) Tichuan, a chanchin aṭanga zir tûr ṭha hriat nân, “A Ṭawngṭaina Pathianin A Chhâng” tih worksheet chu hmang ang che.

 Thurâwn: Bible i chhiar hunah, i rilru i pêk theih nân thâwm awm loh hun thlang ang che.

 Bible chhiar theih dân kawng thumna chu thilthleng chanchin, a nih loh leh fakna hla pakhat thlangin chhiar la, tichuan i nunpui theih dân ngaihtuah ang che. I chhiar zawhah, hêng zawhnate hi inzâwt ang che:

•    Engvângin nge Jehova’n hei hi Bible-ah a telh?

•    Hei hian Jehova mizia, a nih loh leh a thil tih ṭhin dân eng nge a târ lan?

•    Engtin nge he thu hi ka nunpui theih ang?

 Thurâwn: Thiltum insiam la! Bible chhiar ṭan i tum nî chu ziak rawh.