Ṭhalaite Zawhna
Engtin Nge Bible-in Min Ṭanpui Theih?—Ṭhen 2: I Bible Chhiarna Chu Thiltih Nuam Tak Nihtîr Rawh
“A chhiar dân tûr dik tak hriat loh chuan Bible chhiar hi thil ninawm angin a lang thei,” tiin tleirâwl Will-i’n a sawi.
Bible chhiar hi thiltih nuam tak nihtîr theih dân thurûkte hriat i duh em? He thuziak hian a ṭanpui ang che.
Bible thute tinung rawh
I thu chhiarah chêng rawh. Hetiang tih dân hi i hmang thei ang:
Bible-a thilthleng chanchin pakhat thlang rawh. I zir duh tûr Bible-a thilthleng pakhat emaw, Chanchin Ṭha ziaka thu pakhat emaw thlang la, a nih loh leh jw.org-a hmuh theih lemchan ang taka Bible chhiarte zînga pakhat i thlang thei ang.
Thilthleng chanchin chhiar rawh. Nangmahin i chhiar thei a, a nih loh leh i ṭhiante emaw, i chhûngte emaw nên a riin in chhiar thei a ni. Mi pakhatin chanchin sawituah ṭangin a chhiar thei a, mi dangte chuan a changtu dangteah ṭangin an chhiar thei a ni.
A hnuaia rawtnate zînga pahnih khat tichhin rawh:
Thilthleng chanchin târ langtu lem ziak rawh. A nih loh leh, storyboard—a indawta thil thlen dân târ langtu lem hrang hrangte—ziak rawh. Tichuan, lem tinahte chuan a hrilhfiahna thu ziak tel rawh.
A lem ziak rawh. Entîr nân, mi rinawm tak chanchin i chhiar laiin a mize ṭhate leh a thiltih avânga malsâwmna a dawnte chu thlun zawm rawh.
Thilthleng chu a takah chantîr rawh. Thilthleng chu kil tin aṭangin thlîr la, a changtute leh mita hmutute “biangbiakna” telh ang che.
A changtute zînga pakhatin thu tlûkna dik lo a siam, kawng danga a thlâk theih dân mitthla rawh. Entîr nân, Isua phatsantu tirhkoh Petera hi ngaihtuah ta ila. (Marka 14:66-72) Engtin nge Petera’n nêksâwrna chu ṭha zâwka a chhân lêt theih ang?
Thuziak lam thiam mi nia i inhriat chuan Bible-a thilthleng ṭanchhanin lemchan thawnthu ziak la. Thilthleng aṭanga zir theih tûrte telh ang che.—Rom 15:4.
Bible thu i tinung thei!
Chhui zau rawh!
Thilthleng chanchin pakhat kimchang taka i bihchiang a nih chuan lunghlu inphûmrute chu i lai chhuak thei ang. A nihna takah chuan, Bible-a thilthlenga thu mal pahnih khat lekte hian awmze ril tak neih châng a nei a ni.
Entîr nân, Matthaia 28:7 leh Marka 16:7 hi khaikhin la.
Engvângin nge Marka’n Isua chu zirtîrte leh “Petera hnênah” a inlâr thuai dâwn tia chipchiar taka a sawi?
A sihhmuhna: Marka chu hêng thilthlengte mita hmutu a ni lo va; a chanchin hriat chu Petera hnên aṭanga a hriat a nih ngei a rinawm.
Lunghlu inphûmru: Isua’n a hmu leh duh tih hriat chu Petera tân engvângin nge a thlamuanthlâk? (Marka 14:66-72) Engtin nge Isua chuan Petera tân ṭhian ṭha tak a ni tih a târ lan? Engtin nge Isua entawnin, mi dangte tâna ṭhian ṭha tak i nih theih ang?
A thute i tihnun a, chanchin kimchang taka i chhui zau chuan Bible chhiar nuam i ti lehzual ang!