ṬHALAITE ZAWHNA
Engtin Nge Mite Biak Dân Kawnga Ka Thiamna Ka Tihhmasâwn Theih?
He thuziakah hian
Engvângin nge hmaichhana kan inbiak ang?
Mi ṭhenkhat chuan hmaichhana inbiak aiin, message thawna inbiak chu nuam an ti zâwk a ni.
“Hmaichhana kan inbiak hian kan thusawite chu siam ṭhat theih emaw, paih bo theih emaw a nih tawh loh avângin a huphurhawm.”—Anna-i.
“Message thawn chu thil tih tûr record sa ang hi a ni a; mahse, hmaichhana inbiak chu mipui hmaa inlanna (live show) ang a ni. Chuvângin, tu emaw ka biak lai hian, ‘Thil sawi sual lo hrâm ang che!’ tih bâk ka ngaihtuah thei lo.”—Jean-i.
Mahse, engtikah emaw chuan hmaichhana mite biak dân i thiam a ngai ang. Entîr nân, ṭhian thar siam tûr te, hnathawh tûr hmua chu hna chu thawk reng thei tûr te leh, i inpeih huna ngaihzâwng nei thei tûrtein mi dangte biak i thiam a ngai a ni.
Thu lâwmawm chu, mite nêna hmaichhana inbiak i hlauh a ngai lo. Mi zakzum tak pawh ni mah la, mite biak dân chu zirin i thiam chho thei a ni.
“Tu pawh hian thu sawi suala zah chem chem châng kan nei ṭheuh va. Fiamthua i lâk thiam pawh a ngai.”—Neal-a.
Inbiak ṭan dân
Zawhna zâwt rawh. Mite thu ngaihven zâwng chu ngaihtuah la, inbiakna bul ṭan nân hmang ang che. Entîr nân:
“Nipui lai khân i zin chhuak em?”
“He website hi a ṭha reuh lutuk. I lo hre tawh em?”
“. . . chungchâng kha i lo hria em?”
Chipchiar lehzuala zawh i duh chuan, i mi biak nêna nuam in tih zâwngte chu ngaihtuah ang che. Entîr nân, school pakhatah in kal em? a nih loh leh, in hnathawhna hmun a inang em? Chutiang a nih chuan, amah nêna in inanna chu hmang ṭangkaiin zawhna i zâwt thei a ni.
“I ngaihven zâwng leh mite chhânna hriat i duh tak zawhnate chu ngaihtuah rawh.”—Maritza-i.
Fîmkhurna tûr: Thu zâwt fiahtu ang maiin zawhna zâwt tam lutuk lo la. Chu bâkah, a tâna chhân harsa thei mi mal thilte chu zâwt suh ang che. “Eng nge i hlauh ber?” a nih loh leh, “Engvângin nge kawr pâwl hlîr i hâk ṭhin?” tih ang chi zawhnate chuan a awm a tinuam lo thei a. Chumi chhunzawma i zawh leh tûr zawhnate chu sawisêlna angin a lang thei a ni.
Chu bâkah, zawhna i zawh hma emaw, i zawh hnu emawa chumi chungchânga i ngaih dânte i hrilh ve zêl a nih chuan thu zâwt fiahtu ang nih chu i pumpelh thei ang. Thu danga sawi chuan, biangbiakna ni lovin inbiakna nihtîr ang che.
I zawhnate chuan thu zâwt fiahtu angin a lantîr che em?
Bible thu bul: “Mihring ngaihtuahna hi li thûk tak ang a ni a; mahse, mi fing chuan a dâwp chhuak thei.”—Thufingte 20:5, C.L. Re-edited.
Ngaithlatu ṭha tak ni rawh. Inbiakna i chhunzawm zêl theih leh theih loh chu i ṭawngkam thiamnaah ni lovin, ngaihthlâk i thiamnaah a innghat a ni.
“Ka mi biak chungchângah thil thar hriat belh ziah ka tum ṭhîn a. A hnuah, kan inbiak leh huna zawh tûr ka hriat theih nân, a thil min hrilhte chu hriat chhuah leh ka tum ṭhîn.”—Tamara-i.
Fîmkhurna Tûr: I sawi leh tûr chungchâng chu engto suh. A thusawite ngun taka i ngaihthlâksak chuan, chumi mila sawi zawm tûrte chu i hre thei dâwn a ni.
Bible thu bul: “Ngaihthlâk chuh sela, thusawi chuh lo sela.”—Jakoba 1:19.
I ngaihsak tak zet tih lantîr rawh. I mi biak chu i ngaihsak tak zet a nih chuan in inbiakna chu nuam i ti lehzual ngei ang.
“A thusawite chu i ngaihven tak zet tih a hriat chuan, sawi tûr hriat mang loh châng nei mah ula, inbiakna nuam tak in nei thei ang.”—Marie-i.
Fîmkhurna tûr: Mi mal thil chu a lutukin zâwt suh. “I kawr chung chu a va nalh ve. Eng zât man nge ?” tih ang chi zawhnate chu a hawihhâwm loh thlâk!
Bible thu bul: “Mahni ta ta mai en lovin, mi dang ta pawh en ṭheuh zâwk rawh u.”—Philippi 2:4.
Engtin nge inbiakna chu i tihtâwp theih? Ṭhalai Unau Jordan-a chuan. “Thu ṭha tak eng emaw sawiin tih tâwp tum rawh,” tiin rawtna a pe a. “Heti hian i sawi thei a ni, ‘Inkawmhona nuam tak a ni,’ a nih loh leh amah hmuh leh theihna tûr ruahmanna siamin, ‘Hun hlimawm tak kan neih leh theih ka beisei,’” tiin.