U.S. Centers for Disease Control and Prevention report chuan kum 15 aṭanga 19 inkâr biangbiakna an neihte zînga a chanve vêlte chuan kâa châkna inhrîkthlâksakna an hman tawh thu a târ lang a. Oral Sex Is the New Goodnight Kiss tih lehkhabu ziaktu, Sharlene Azam-i chuan “Tleirâwlte hnênah [kâa châkna inhrîkthlâksak chungchâng] i sawipui a nih chuan thil pawi vak a nih loh thu an hrilh ang che,” tiin a sawi a. “A nihna takah chuan, mipat hmeichhiat hmannaah an ngai lo a ni.”

•  Engtin nge i ngaih?

•  Thu dik chu eng nge ni?

•  Engvângin nge chu chu a pawimawh?

 A hnuaia zawhnate hi chhâng ang che.

1.   Kâa châkna inhrîkthlâksak avângin hmeichhia a rai thei em?

   1.   Thei

   2.   Thei lo

2.   Kâa châkna inhrîkthlâksak hi hrisêlna atân a hlauhawm em?

   1.   Hlauhawm

   2.   Hlauhawm lo

3.   Kâa châkna inhrîkthlâksak hi mipat hmeichhiat hmanna a tling em?

   1.   Tling

   2.   Tling lo

 I chhânnate chu a hnuaia mi nên hian khaikhin rawh.

1.   Kâa châkna inhrîkthlâksak avângin hmeichhia a rai thei em?

    A chhânna: Thei lo. Hei hi mi tam takin kâa châkna inhrîkthlâksak pawi lo anga dik lo taka an ngaih chhante zînga pakhat a ni.

2.   Kâa châkna inhrîkthlâksak hi hrisêlna atân a hlauhawm em?

    A chhânna: Hlauhawm. Kâa châkna inhrîkthlâksakna chuan mi chu thin vûng natna (hepatitis A, a nih loh leh B) te, serh bula bâwk awm (genital warts) te, sex hmanna aṭang inkhaichhâwn theih natna (gonorrhea) te, vun bawl natna (herpes) te, HIV, leh saihri natnate a kaitîr thei a ni.

3.   Kâa châkna inhrîkthlâksak hi mipat hmeichhiat hmanna a tling em?

    A chhânna: Tling e. Mipat hmeichhiat hmannaah chuan inpâwlna te, kâa châkna inhrîkthlâksak te, mawngkuaa inpâwl te, leh mi dang serh hrawtsak ang chîte pawh a tel vek a ni.

 Kâa châkna inhrîkthlâksak nêna inkûngkaih Bible châng hrang hrang lo ngaihtuah ta ila.

 Bible sawi dân: “Pathian duhzâwng . . . chu hei hi a ni, inngaih bânsan ula.”—1 Thessalonika 4:3.

 “Inngaih” tia lehlin a tîra ziak thu mal chuan innei lote inkâra sex hmanna te, kâa châkna inhrîkthlâksak te, mawngkuaa inpâwlna te, mi dang serh hrawtsak te a kâwk vek a. Nungchang bawlhhlawhnaa inhmangtu chuan sawhkhâwk azawnga pawi ber Pathian nêna inṭhianna a tichhe thei a ni.—1 Petera 3:12.

 Bible sawi dân: “Mi ngaih hmang erawh chuan ama taksa chungah thil a tisual a ni.”—1 Korinth 6:18.

 Kâa châkna inhrîkthlâksakna chuan tisa lam leh thlarau lamah sawhkkhâwk pawi tak a nei thei a. Rilru hahna a thlen thei bawk. Talking Sex With Your Kids tih lehkhabu chuan, “hman hnua inngaihna, inchhîrna, leh mahni invênghim thei lova inhriatna te hi mipat hmeichhiat hmanna aṭang pawhin neih a ni fo,” tiin a sawi. “Mi chuan dinhmun dik lova mipat hmeichhiatna a hman avânga rilru hrehawmna a neih ang chu kawng dik lo taka mipat hmeichhiatna a hmanna engpawh aṭangin a nei thei a ni. Sex chu sex a ni tho tho.”

 Bible sawi dân: “Kei hi LALPA in Pathian, in ṭhatna tûra nangmahni zirtîrtu . . . ka ni.”—Isaia 48:17.

 Sex chungchânga Pathian dânte chu i hlâwkpui tak zet i ring em? Nge ni a, chûngte chuan a khuahkhirh chein i hre zâwk? Hêng zawhnate chhâng tûr hian lîrthei tlân chak zâwng bituk chin te, traffic signal te, leh ding tûra chhinchhiahna târna te awmna kawngpui lûn tak hi han ngaihtuah teh. Chûng chhiahchhiahnate leh signal-te chu khuahkhirhna angin nge, vênhimna angin i thlîr dâwn? Chûng dân zamte chu nangmah leh motor khalhtu dangte’n in ngaihthah a nih chuan eng thil nge thleng ang?

 Pathian tehnate pawh chutiang chiah chu a ni a. I ngaihthah a nih chuan i theh rah chu i seng ngei ang. (Galatia 6:7) Sex Smart tih lehkhabu chuan, “I thurin leh i thil ngaihhlutte ngaihthah a, thil dik lo nia i hriata i inhman tam poh leh mahni inzahna i nei tlêm sauh vang,” tiin a sawi. Chumi nêna inkalh takin, Pathian tehnate mila i nun chuan nungchang ṭha tak tak i lantîr ang a. Chu aia pawimawh zâwk chu chhia leh ṭha hriatna thiang i nei reng ang.—1 Petera 3:16.