ṬHALAITE ZAWHNA
Inngaihzâwnna—Ṭhen 1: Ngaihzâwng Nei Tûrin Ka Inpeih Tawh Em?
He thuziakah hian
Inngaihzâwnna chu eng nge ni?
Mi ṭhenkhat chuan inngaihzâwnna chu thil nuam tak tih ang lêkin an ngai a. Mahse, he thuziakah hian, “inngaihzâwnna” tih hian tlangvâl leh nula chu nupui pasal inâwm tak an ni thei dâwn nge ni thei dâwn lo tih hriat theih nâna hun engemaw chen hman dunna a kâwk a. Chuvângin, inngaihzâwnna chuan thiltum a nei a ni. Hei hi mipa leh hmeichhia inngaihvenna satliah mai a ni lo.
A tâwpah chuan, inngaihzâwnnain thu tlûkna siam tûrin a ṭanpui tûr che a ni—in innei dâwn nge, in inlaichînna an titâwp dâwn tih chu. Ngaihzâwng i nei ṭan a nih chuan, chûng pahnih tâna i inpeih a ngai a ni.
A pawimawh ber chu: Ngaihzâwng nei tûra inpeih tawh nia i inhriat chuan, nupui pasal nei tûrin i inpeih tawh tihna a ni.
Inneih tumna nei lo va inngaihzâwn chu hna thawh tak tak tum si lo va, hna zawng ang a ni
Ngaihzâwng nei tûrin ka inpeih tawh em?
Inngaihzâwnna chuan inneihna a thlen thei a, chuvângin, in inlaichînna nghawng theitu tûr eng miziate nge i neih tih ngun taka i ngaihtuah a ngai a ni. Entîr nân, a hnuaia thute hi ngaihtuah ang che:
Chhûngkaw inlaichînna. I nu leh pa leh i unaute—a bîk takin, dinhmun khirh tak i tawh huna—i cheibâwl dân chuan i kawppui i cheibâwl dân tûr chu a hril ang.
Bible thu bul: “Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se, sualna zawng zawng nên.”—Ephesi 4:31.
Inzâwt rawh: ‘Ka nu leh pa leh unuate’n anni chu zah takin ka cheibâwl niin an sawi em? Thu inhmuh loh châng a awm hunah, rilru zaidam takin ka sawipui, nge ni a, thinrimin ka hnial vak vak ṭhîn zâwk?’
I nu leh pa nên in inrem thei lo a nih chuan, i kawppui nên in inrem thei tak tak ang em?
Mahni hmasial lohna. Nupui pasal nei i nih chuan, i kawppui duh zâwngte chu i ngaihtuahsak a, i dah pawimawh zâwk fo a ngai ang.
Bible thu bul: “Tu pawhin mahni ṭhatna tûr zawng lovin mi dang ṭhatna tûr zawng zâwk rawh se.”—1 Korinth 10:24.
Inzâwt rawh: ‘Ka duh dân chauhvin ka ti ṭhîn em? Mite’n a âwm tâwk hre mi niin min thlîr em? Mi dangte ka dah pawimawh zâwk tih eng kawngtein nge ka târ lan tawh?’
Inngaihtlâwmna. Kawppui ṭha chuan a thil tihsual chu a pawm ngam mai bâkah, ngaihdam pawh a dîl ngam bawk a ni.
Bible thu bul: “Kan zain thil tam tak kan tisual fo ṭhîn.”—Jakoba 3:2.
Inzâwt rawh: ‘Ka thil tihsualte chu ka pawm ngam em, nge ni a, chhuanlam ka siam ṭhîn zâwk? Mite’n ka hmasâwnna tûr min hrilh hunah dawnsawn ka harsat ṭhîn em?’
Sum leh pai. Sum leh pai hmang thiam mi chuan nupa inkâra buaina thleng tam berte zînga pakhat chu a pumpelh thei ang.
Bible thu bul: “Nangni zîngah tupawhin in sâng sak tum ula, atîrin ṭhuin sak zawhna khawp sum in neih leh neih loh hre tûrin, a man tûr chin tu nge chhût lo vang che u?”—Luka 14:28.
Inzâwt rawh: ‘Sum hman dânah insumtheihna ka lan tîr em, nge ni a, leibate ka nei fo ṭhîn zâwk? Engtin nge sum leh pai hmang thiam tak ka ni tih kan lantîr?’
Thlarau lam thiltih. Jehova Thuhretu zînga pakhat i nih chuan, Bible zirna leh Kristian inkhâwmna chungchângah hun duan ṭha tak i nei tûr a ni.
Bible thu bul: “Pathian kaihhruaina mamawh nia inhriate chu an hlim e.”—Matthaia 5:3, NWT.
Inzâwt rawh: ‘Thlarau lam thiltihte nei reng tûrin ṭan ka la em? Thlarau lam thiltihte chu ka dah pawimawh ber, nge ni a, thil dangte ka intihbuaitîr ṭhîn zâwk?’
A pawimawh ber chu: Kawppui atâna i thlana chuan kawppui ṭha vêk a phû a ni. Chutiang ni tûra theih tâwp i chhuah a nih chuan, chutiang mi vêk chuan a rawn ngaihven che a rinawm.
