I ṭhiante zawng zawng chuan social media an hmang pawh a ni thei a, chumi chungchâng ringawt an sawi pawh a ni thei. Account i neih ve loh avângin an nuihsawh che pawh a ni thei. Social media chungchângah eng nge i hriat ngai? Eng nge i tih theih awm?

 Nangmah chauh i ni lo. Nu leh pa tam tak chuan an fate chu social media hman an phal lo va. Social media hmanna chu hêng a hnuaia târ lante a thlen thei nia an hriat vâng a ni thei ang:

•   rilru hahna nasa tak leh rilru lama harsatna dangte.

•   saruak lem leh thuziak te, lem dukdak lo inthawn te leh, cyber hmanga inhnehchhiahna.

•   ṭhiante inkâra ṭûl lo taka inhriatsualna.

 Tleirâwl tam tak chuan social media hman tawh loh an thlang. Social media hian an chungah nghawng ṭha lo a nei tih anmahni ngeiin an hria a ni. A hnuaia thiltawn tak takte hi han ngaihtuah teh:

•   Priscilla-i chuan social media-in a hun hlu takte chu a ei ral ṭhîn tih a hmuchhuak a ni.

•   Jeremy-a chuan social media a hman laia thil ṭha lo tak tak lo lang ṭhînte a thunun thei lo chu a duh lo.

•   Bethany-i chuan social media-in mi dangte thiltih a ngaihventîr lutuk tih a hmuchhuak a ni.

 “Social media app chu ka phone aṭangin ka paih bo va, chutianga ka tih avângin ka lâwm hle. Ka paih bo avângin ka inchhîr lo, tûnah chuan ka tâna thil pawimawh berte tân hun ka pe tam thei tawh zâwk a ni.”—Sierra-i.

 “Social media ngawlvei nih chu ka duh lo va, ka thil pho chhuahte chu mite’n engtin nge an chhâng lêt ang tih ka lungkham fo va. Account paih bo chu thil awl lo tak a ni; mahse, ka han paih bo chuan ka hahdam huai a. Account tel lovin thlamuanna ka nei zâwk a ni.”—Kate-i.

 I nu leh pate dân siam chu zâwm rawh. Chûng an dân siamte chu thinrim leh sawisêl lova i zawmna hmangin i puitlin tawhzia lantîr rawh.

 Bible thu bul: “Mi â chuan a thinur thu zawng zawng a sawi chhuak a, mi fing erawh chuan an thup a, an ngawihpui ṭhîn.”—Thufingte 29:11.

 Mi ṭhenkhat chuan i nu le pate râwn lo va social media hmang turin, a nih loh leh a rûka account nei tûrin an fuih mai thei che a. Chu chu a dik lo tawp! Thil engemaw thup i neih chuan lungkhamna emaw, thlaphânna emaw i nei ang. Chu bâkah, an hriat chhuah chuan, i tân a pawi ang a—an ring ngam tawh lo vang che.

 Bible thu bul: “Engkimah fel taka awm tum [rawh].”—Hebrai 13:18.

 Tum tlat rawh. A chunga târ lan tâk ṭhalaite angin, social media i hman lohna tûr chhan tam tak i nei mai thei a. Social media hman chu i tâna thil ṭha ber a ni lo tih a chian tawh chuan, i nu leh pate thu tlûkna siam vâng mai ni lovin, nangma thu tlûkna siam avânga hmang tawh lo ni ang che. Chutiang chuan, i ṭhiante’n an zawh hunah che pawh, i hlauhthâwn a ngai tawh lo vang a—an sawichhe ngam tawh lo sawt ang che.

 A pawimawh ber chu: Social media chungchângah i nu leh pate dân siam chu zâwm la, inlungrual tlâng theih tûrte hriat tum la, mahniin thu tlûkna i siam thei ang. Tûnah rih chuan, social media tel lovin i awm thei ang.