A châng chuan, Pathian betu ṭhenkhat chuan Bible tehnate mila nun hi a manhlain, a hlâwk thlâk tak zet em tih an ngaihtuah ṭhîn a. (Sâm 73:2, 3) Jehova dân kalh zâwngin thil an ti ṭan hial thei a, chutiang chuan, an nunchang ṭha lo chu thup tlatin Pathian betu dangte chu bum an tum a ni.

 He thuziak hi chutiang kawng zawh a, bânsan duh leh tute ṭanpui nâna ziah a ni.

He phêkah hian

•  Nun kawng chi hnih chu eng nge ni?

•  Nun kawng chi hnih zawhna chuan mi sualah min siam em?

•  Engtin nge nun kawng chi hnih zawh hi ka bânsan theih ang?

•  I ṭhiante sawi

 Nun kawng chi hnih zawh tih chu i ṭhiante nêna hun in hmanho lai chuan Jehova thu i zâwm duh lo va, dik lo nia i hriatte chu i ti a; mahse, kohhrana unau rinawmte nêna in awmho hun chuan Jehova rawng bâwl duhtu angin i awm a ni. Chu chu nun kawng chi hnih zawh i ni a, hmaikâwr invuah ang i ni.

 “Nun kawng chi hnih i zawh hian chu kawng pahnihah chuan i inthup tlat a, mite’n tu nge i nih chiah tih an hre thei lo che a. Dik tak chuan, nun kawng chi hnih i zawh hian tu chungah mah i rinawm lo a ni.”—Erin-i.

 I lo hria em? Nun kawng chi hnih zawhnaah hian nangmah chauhva i awm huna Jehova duh loh zâwngte tih pawh a tel thei a ni.

 “Kum 14 ka nihin, Internet aṭangin nungchang bawlhhlawhna film-te ka en ṭan a. Mi dangte hmaah chuan nungchang bawlhhlawhna haw deuh angin ka lang a; mahse, ka haw lo tih ka inhre kur a ni.”—Nolan-a.

 Bible thu bul: “Tu man hotu pahnih rawng an bâwl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang.”—Matthaia 6:24.

 Chutiang chu a ni kher lo. Mi ṭhenkhat chuan Bible tehnate mila nun chu an duh lo va. Mahse, chutiang chu i ni ve em? Nge ni a, nun kawng chi hnih i zawh chhan chu hêng a hnuaia chhante avâng zâwk hi a ni em?

•   I rualpuite laka danglam bîk nih chu nuam i ti lo.

•   Kohhrana unaute aiin i school kalpuite nên in tui zâwng a inang zâwk niin i hria.

•   Pathian thupêk zawng zawng zâwm vek tûr khawpin chakna leh theihna nei lo niin i inhria.

 “Ṭhalai ṭhenkhatin Kristian tehna zâwm lotute nêna hun hman dun nuam an tih zâwk chhan chu mi zînga tlâktlum an duh vâng niin ka hria.”—David-a.

 Khâng zînga a pakhat mah kha nun kawng chi hnih zawhna tûr chhan a ni lo. Mahse, khâng a chhante khân, mi ṭhenkhatin nun kawng chi hniha an zawh tâk chhan a târ lang a ni. Chutiangin i lo awm a nih chuan, eng nge i tih theih?

1.  1. Tûna i nun dân kha en dik rawh. Heti hian inzâwt rawh: ‘Hetiang mi nih hi ka duh rêng em? Ka duh lo a nih chuan, ka duh thlanna hian kawi lamah nge mi hruai theih?’ tiin.

    Bible thu bul: “Mi fing chuan thil ṭha lo a hmu a. . . , mi mâwl erawh chuan a tâwn ṭhîn a, a tuar phah ṭhîn.”—Thufingte 27:12.

2.  2. Rilru dik tak pu rawh. I dinhmunte chu i nu leh pate, a nih loh leh Jehova dânte zah êm êmtu Kristian puitling tuemaw sawipui ang che. An hnêna ṭanpuina i dîl avângin an lâwm hle ngei ang. Chu bâkah, thil dik tih duhna i nei tih an hmuh avângin an chhuang hle bawk ang che!

    “Ka thil sual tihte mi dangte hnêna hrilh chu ka tâna thil tih harsa ber zînga pakhat a ni a; mahse, chutianga ka tih hnu chuan rilrua hahdamna nasa tak ka nei.”—Nolan-a.

    Bible thu bul: “Bawhchhiatna zêptute chu an hmuingîl lo vang a, zêp lova inpuanga hawisantute chuan zahngaihna an hmu ang.”—Thufingte 28:13.

3.  3. A sawhkhâwkte chu pawm rawh. Hei hi hre rawh, i nu leh pate leh kohhran lakah thil engemaw i thup a nih chuan, rinchhan harsa an tih phah ang che. Chuvângin, i nu leh pate leh kohhran chuan hun engemawti chhûng chu chanvo hlu a pe lo vang che. Chûng a sawhkhâwkte chu pawm la, tûn aṭang chuan “dik takin” thiltih tum tlat ang che.—Hebrai 13:18.

    Bible thu bul: “A tâwp a tâwpa i lo fin theih nân zilhna pawm la, thununna pawisa rawh.”—Thufingte 19:20.

4.  4. Pathianin a hmangaih che tih ring nghet tlat rawh. Jehova’n min hmangaih avângin, kan thiltih engkim a hre vek a. Chuvângin, nun kawng chi hnih i zawh a nih chuan, chu chu a hriain, a lâwm lo hle a ni. Mahse, “anin a ngaihsak ṭhin che u avângin,” i kawng zawh chu siam ṭha tûrin ṭanpui che a châk hle a ni.—1 Petera 5:7.

    Bible thu bul: “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni.”—2 Chronicles 16:9.