Bible chhânna

 Baptisma chu tuia hnimphûmna a ni a. a Bible-ah hian baptisma channa tam tak chhinchhiah a ni. (Tirhkohte 2:41) Chûng zînga pakhat chu, Isua Jordan Luia inhnimphûma baptisma a channa kha a ni a. (Matthaia 3:13, 16) Kum tam tak hnuah, Ethiopia mi chuan a zinna kawngpui bula ‘tuiah’ baptisma a chang bawk a ni.—Tirhkohte 8:36-40.

 Isua chuan a hnungzuitute’n baptisma an chang tûr a ni tih a zirtîr a. (Matthaia 28:19, 20) Tirhkoh Petera pawhin chutiang tho chuan a zirtîr a ni.—1 Petera 3:21.

He thuziakah hian hêngte hi a tel

•  Baptisma awmzia chu eng nge ni?

•  Nausên baptisma chantîrna chungchângah Bible-in eng nge a sawi?

•  Pa leh Fapa leh thlarau thianghlim hminga baptisma chan awmzia chu eng nge ni?

•  Baptisma chan nawn hi sual a ni em?

•  Bible-a târ lan baptisma channa dangte

•  Kristian baptisma chungchânga ngaih dân dik lote

 Baptisma awmzia chu eng nge ni?

 Baptisma chu miin a sualte sima Pathian duh zâwng ti tûrin thu a tiam tih vântlâng hmaa târ lanna a ni a. Chutah chuan dam chhûnga Pathian leh Isua thuawihna a tel a. Baptisma changtute chuan chatuana nun theihna kawng an zawh ṭan a ni.

  Isua chuan a zirtîrte hnênah: “Zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” tiin kaihhruaina a pe a. (Matthaia 28:19, 20) “Hmingah” tih awmzia chu baptisma changtu chuan Pa leh Fapa thuneihna leh, Pathian thlarau thianghlim chanvo chu a hre thiamin a pawm tihna a ni. Entîr nân: Tirhkoh Petera chuan pian tirh ata ke bai pakhat chu: “Nazaret Isua Krista hmingin kein kal tawh rawh,” tiin a hrilh a. (Tirhkohte 3:6) A awmzia chu a chiang a ni—Petera chuan Isua thuneihna chu pawmin, chu thilmak tihna hmanga tihdamna chu Isua vâng a ni tih a hria a ni.

•   “Pa” chu Pathian Jehova b sawina a ni a. Siamtu, Nunna Petu leh, Pathian Engkimtitheia a nih angin Jehova chuan thuneihna sâng ber a nei a ni.—Genesis 17:1; Thu Puan 4:11.

•   “Fapa” chu kan tâna a nun petu, Isua Krista a ni a. (Rom 6:23) Mihringte tâna Pathian thiltuma Isua chanvo pawimawh tak chu kan hriata kan pawm loh chuan chhandam kan ni lo vang.—Johana 14:6; 20:31; Tirhkohte 4:8-12.

•   “Thlarau thianghlim” chu Pathian chakna chevêl reng, a nih loh leh a thiltihtheihna a ni a. c Pathianin a thlarau thianghlim chu thil siam nân te, nunna pêk nân te, a zâwlneite leh mi dangte hnêna thuchah hrilh nân te leh, a duh zâwng ti tûra anmahni tihchak nânte a hmang a ni. (Genesis 1:2; Joba 33:4; Rom 15:18, 19) A ngaihtuahnate ziak tûra Bible ziaktute thâwk khum nân a hmang bawk.—2 Petera 1:21.

Baptisma chan nawn hi sual a ni em?

  Mi tam tak chu sakhaw dangah an inlet ṭhîn a. Mahse, an kohhran hmasaah baptisma chang tawh ta se, engtin nge ni ang? Baptisma chang nawn ta se, chu chu thil sual a ni ang em? Mi ṭhenkhat chuan Ephesi 4:5-a: “Lalpa pakhat, rinna hmunkhat, baptisma hmun khat,” tih thu chu ṭanchhanin thil sual niin an ngai a. Mahse, he Bible châng hi tu emaw chu baptisma a chang nawn tûr a ni lo tia sawina a ni lo. Engtin nge?

 Thu hnu leh thu hma. Ephesi 4:5 thu hnu leh thu hma chuan, tirhkoh Paula’n Kristian dikte tân an thurin leh an rinnaa an inpumkhat a pawimawhzia a sawi uar a ni tih a târ lang a. (Ephesi 4:1-3, 16) Chutiang inpumkhatna chu Lalpa thuhmun, Isua Krista hnung an zui a, rinna thuhmun, a nih loh leh Bible zirtîrna hriatthiam dân inang an neih a, baptisma chang thei tûra Bible-in thil thuhmun a phûtte chu an zawm chauhvin an nei thei a ni.

 Tirhkoh Paula chuan baptisma chang tawh mi ṭhenkhat chu baptisma chang nawn tûrin a fuih bawk a. Kristian zirtîrna hriatthiamna pumhlûm nei lova baptisma an chan vâng a ni.—Tirhkohte 19:1-5.

 Baptisma channa atâna ṭanchhan dik tak. Baptisma chu Pathian pawm tlâk ni tûr chuan Bible thutak hriatna dik takah a innghat tûr a ni a. (1 Timothea 2:3, 4) Bible zirtîrna nêna inkalh sakhaw thiltihte ṭanchhanin miin baptisma a chang a nih chuan, chu baptisma chu Pathianin a pawm lo vang. (Johana 4:23, 24) Rilru dik tak pu mah se, ‘hriatna dik tak’ ṭanchhan a nih loh vâng a ni. (Rom 10:2) Pathian pawm a nih theih nân, Bible thutak a zir a, a thil zirte a nunpui a, Pathian hnêna a inpumpêk a, baptisma a chan nawn leh a ngai ang. Hetiang dinhmuna baptisma a chan nawn lehna chu sual a ni lo. A tih tûr dik tak a ni zâwk a ni.

Bible-a târ lan baptisma channa dangte

  Bible chuan tuia inhnimphûma Krista hnungzuitute baptisma channa laka awmze dang nei baptisma channa dangte a târ lang a. Entîrna ṭhenkhat lo ngaihtuah ta ila.

 Baptistu Johana chantîr baptisma. d Juda leh Juda saphunte chu Mosia Dân—Pathianin Mosia hmanga Israelte hnêna Dân a pêk—an bawhchhiat avânga an inlamlêtzia entîr nân Johana’n baptisma a chantîr a. Johana baptisma chuan mite chu Messia, Nazaret Isua hriaa pawm tûrin a buatsaih a ni.—Luka 1:13-17; 3:2, 3; Tirhkohte 19:4.

 Isua baptisma chan. Johana’n Isua baptisma a chantîrna chu a danglam bîk hle a. Isua chu sualna nei lo mi ṭha famkim a ni. (1 Petera 2:21, 22) Chuvângin, a baptisma chanah chuan sual simna, a nih loh leh “chhia leh ṭha hriatna thianga Pathian lamna” a tel ve lo. (1 Petera 3:21) Chu aiin, hrilh lâwk Messia, a nih loh leh Krista a nih anga Pathian duh zâwng ti tûra a inpêkna a entîr zâwk a. Chutah chuan kan tâna a nun a pêkna pawh a tel a ni.—Hebrai 10:7-10.

 Thlarau thianghlima baptsima channa. Baptistu Johana leh Isua Krista chuan thlarau thianghlim hmanga baptisma channa chungchâng an sawi ve ve a. (Matthaia 3:11; Luka 3:16; Tirhkohte 1:1-5) Chu chu thlarau thianghlim hminga baptisma channa nên a inang lo. (Matthaia 28:19) Engvângin nge?

 Isua hnungzuitu tlêm tê chauh thlarau thianghlim hmanga baptis an ni a. Anni chu Krista nên lal leh puithiamte nia vân aṭanga leia rorêl tûra koh an nih avângin thlarau thianghlim hmanga hriak thih an ni. e (1 Petera 1:3, 4; Thu Puan 5:9, 10) Lei Paradis-a chatuan nun beiseina neitu Isua hnungzui mi maktaduai tam takte chu an khua leh tuite an ni ang.—Matthaia 5:5; Luka 23:43.

 Krista Isuaa baptisma channa leh a thihnaa baptisma channa. Thlarau thianghlim hmanga baptis-te chu “Krista Isuaa baptisma chang,” an ni bawk. (Rom 6:3) Chuvângin, chu baptisma channa chu vâna Isua nêna rorêl tûr a hnungzui hriak thihte chungah a thleng a. Isuaa baptisma changin a hriak thih kohhran zînga mite an ni ta a. Ani chu Lû a ni a, anni chu taksa an ni.—1 Korinth 12:12, 13, 27; Kolossa 1:18.

 Hriak thih Kristiante chu “[Isua] thihnaah baptisin” an awm bawk a. (Rom 6:3, 4) Isua entawnin, mahni duh zâwng ti lovin Pathian duh zâwng tiin an nung a, an chatuan nunna tûr chu leiah a ni dâwn lo tih an hria a ni. An thih hunah he entîr nei baptisma hi an chang a; tichuan, vânah thlarau thil siam anga kaihthawhin an awm a ni.—Rom 6:5; 1 Korinth 15:42-44.

 Meia baptisma channa. Baptistu Johana chuan a thu ngaithlatute hnênah: “[Isua] chuan thlarau thianghlim leh meiin a baptis ang che u; a kutin a sisêp a keng a, a hrui a zâp fai hliau ang a, zêmah chuan a buh a khung ang, a sî erawh chu mei mit thei lovin a hâlral ang,” tiin a sawi a. (Matthaia 3:11, 12) Meia baptisma channa leh thlarau thianghlima baptisma channa chuan inan lohna a nei tih chu chhinchhiah ang che. Johana sawi awmzia chu eng nge ni?

 Buh chuan Isua thu ngaithlaa zâwmtute a entîr a. Anni chuan thlarau thianghlima baptisma chan theihna chanvo an nei a ni. Buh sî erawh chuan Isua thu ngaithla duh lotute a entîr thung a. Anni chuan chatuana boralna entîrtu, meiah baptisma an chang ang.—Matthaia 3:7-12; Luka 3:16, 17.