Hmânlai Israel mite chu biakna dik ṭanpuina atâna kum tin an thil haw aṭanga sâwma pakhat a thawh tûra thupêk an ni a. Pathianin an hnênah: “Kum tin in lova thlai haw zawng zawng sâwma pakhat in tihrang ngei ngei tûr a ni,” tiin a hrilh a ni.—Deuteronomy 14:22.

 Sâwma pakhat pe tûra thupêk chu Pathianin hmânlai Israelte hnêna a pêk Mosia dâna tel a ni a. Mosia dân hnuaia an awm tawh loh avângin Kristiante chuan sâwma pakhat an pêk a ngai tawh lo. (Kolossa 2:13, 14) Chu aiin, ‘Pathian chuan hlim taka petu a hmangaih avângin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin’ Kristian tinte chuan an sum leh paite chu an pe a ni.—2 Korinth 9:7.

•  Bible-a Sâwma Pakhat—“Thuthlung Hlui” Hunah

•  Bible-a Sâwma Pakhat—“Thuthlung Thar” Hunah

 Sâwma pakhat hi Bible-a Thuthlung Hlui tia hriat lâr chhûngah vawi tam tak a chuang a. A tam zâwk chu Mosia kaltlanga Israelte hnêna Dân (Mosia Dân) pêk a nih hnua thilthleng nên a inkûngkaih a. Mahse, chu dân pêk a nih hma chuan sâwma pakhat chungchâng vawi hnih chauh a chuang a ni.

Mosia Dân pêk a nih hma

 Sâwma pakhat pe hmasa bertu chu Abrama (Abrahama) a ni a. (Genesis 14:18-20; Hebrai 7:4) Abrama sâwma pakhat pêk chu Salem khaw puithiam lal hnêna vawi khat thilthlâwn pêk niin a lang. Bible-ah Abrahama, a nih loh leh a fate’n a hnuah sâwma pakhat an pêk leh thu finfiahna hmuh tûr a awm lo.

 Bible-a târ lan sâwma pakhat petu dang leh chu Abrahama tupa Jakoba a ni a. Pathianin mal a sâwm chuan a hnênah a dawn “zawng zawngah chuan sâwma pakhat” a pêk tûr thu a tiam a ni. (Genesis 28:20-22) Bible lama mi thiam ṭhenkhat sawi dânin, Jakoba sâwma pakhat pêk chu rana inthawina niin a lang. Jakoba chuan a thutiam vawngin sâwma pakhat pe mah se, a chhûngte chu sâwma pakhat pe ve tûrin a ti lo.

Mosia Dân Hnuaiah

 Hmânlai Israel mite chu an sakhaw thiltihte ṭanpui nân sâwma pakhat pe tûra thupêk an ni.

•   Sâwma pakhat chu thlai chîng tûra ram nei ve lo hun puma sakhaw rawngbâwltute—puithiamte pawh tiamin Levia chite—tâna pêk a ni a. (Numbers 18:20, 21) Puithiam ni lo Levia chite chuan mite hnên aṭangin sâwma pakhat an dawng a, chu an dawn zînga ṭha ber “chu mi sâwma pakhat ata sâwma pakhat chu” puithiamte hnênah an pe ve leh a ni.—Numbers 18:26-29.

•   Levia chite leh Levia chi ni lote’n an hlâwkpui kum tina pêk sâwma pakhat dang pawh a awm niin a lang. (Deuteronomy 14:22, 23) Israel chhûngkuate chuan chûng sâwma pakhatte chu kût nî engemaw bîk lawm nân an hmang ṭhîn a, kum dangahte chuan mi retheite ṭanpui nân an hmang a ni.—Deuteronomy 14:28, 29; 26:12.

 Engtin nge sâwma pakhat chu chhût a nih? Israel mite chuan kum tina an lova thil hâwng aṭangin sâwma pakhat an dah hrang ṭhîn a. (Leviticus 27:30) Sâwma pakhat chu an lova thil hâwng ni lova a suma pêk an thlang a nih chuan a hlutna zaa 20 an pêk belh a ngai a ni. (Leviticus 27:31) “Ran leh berâm rual zînga sâwma pakhat” pe tûra thupêk an ni bawk—Leviticus 27:32.

 Israel mite chuan kum tin an ran rual zînga mi sâwma pakhat atân an dah hrang ṭhîn a. Dânin a târ lan dân chuan an ran dah hrante chu an bih chiang emaw, an thlâk emaw thei lo va, sâwma pakhat atân sumah an chantîr thei hek lo. (Leviticus 27:32, 33) Amaherawh chu, kum tina an hman ṭhin kûta mi tûr erawh chu sumah an chantîr thei thung. He ruahmanna hian hmun hla tak aṭanga kût hmang tûra kal Israel mite chu a chhâwk zângkhai a ni.—Deuteronomy 14:25, 26.

 Engtik hunah nge Israel mite’n sâwma pakhat an pêk? Israel mite chuan kum tin sâwma pakhat an pe a. (Deuteronomy 14:22) Mahse, kum sarih kum apiangin ruahmanna dang siam a ni. Chu kum chu sabbath, a nih loh leh chawlh dêrna kum a ni a, Israel mite chuan buh leh bâl an chîng lo a ni. (Leviticus 25:4, 5) He dinhmun danglam bîk tak avâng hian buh seng hunah sâwma pakhat pêk a ni lo. Sabbath kum, kum sarihna chhûnga a kum thumna leh kum rukna apiangah Israel mite chuan sâwma pakhat dang la khâwmin mi retheite leh Levia chite an pe a ni.—Deuteronomy 14:28, 29.

 Sâwma pakhat pe lo hremna chu eng nge ni? Mosia Dân chuan sâwma pakhat pêk loh avânga hremna chu a târ lang lo va. Sâwma pakhat chu pêk ngei tûr a ni. Israel mite chuan Pathian hmaah sâwma pakhat an pe tih an puang tûr a ni a, chutianga an pêk avâng chuan Pathian malsâwmna an dîl thei. (Deuteronomy 26:12-15) Pathian chuan sâwma pakhat pêk loh chu a ta rûksak angin a ngai a ni.—Malakia 3:8, 9.

 Sâwma pakhat chu phurrit a ni em? Ni lo. Pathianin Israel hnamte chu sâwma pakhat an pêk chuan mal a sâwm ang a, engmah an tlachham lo vang tih a tiam a. (Malakia 3:10) Kawng leh lamah, an pêk loh erawh chuan a hnam pumin an tawrh phah a ni. Pathian malsâwmna an dawng tawh lo va. Chu bâkah, puithiamte leh Levia chite’n lo lama hna an thawh a ngaih avângin Israel mite chu Pathian be tûrin an ṭanpui thei tawh lo.—Nehemia 13:10; Malakia 3:7.

 Isua mihring anga leia a awm lai khân, Pathian betute tân sâwma pakhat chu phût a la ni reng a. Mahse, Isua thih hnuah chu phûtna chu a tâwp a ni.

Isua hunah

 Bible-a Thuthlung Thar tia kan hriat lâr takah hian Isua leia a awm laiin Israel mite’n sâwma pakhat an la pe zawm zêl tih a chuang a. An tân sâwma pakhat pêk ngei tûr a ni tih a pawm a, mahse ‘dân thu pawimawh zâwk felna te, khawngaihna te, rinawmna te ngaihthah a’ sâwma pakhat khêr mai taka petu sakhaw hruaitute chu a dem a ni.—Matthaia 23:23.

Isua thih hnuah

 Isua thih hnuah erawh sâwma pakhat pêk a ngai tawh lo va. Isua thihna inthawina chuan “sâwma pakhat lâk tûr thu” pawh tiamin, Mosia dân a tibo a ni.—Hebrai 7:5, 18; Ephesi 2:13-15; Kolossa 2:13, 14.