Bible chuan phal tak leh rilru put hmang dik tak neia thil pe tûrin min fuih a. Chutiang thilpêk chu a dawngtu chauh ni lovin, a petu pawhin a hlâwkpui tih a târ lang a ni. (Thufingte 11:25; Luka 6:38) Isua chuan: “Englo lâk aiin pêkin lukhâwng a nei zâwk,” tiin a sawi.—Tirhkohte 20:35.

•  Engtianga thilpêkin nge Pathian tilâwm?

•  Engtianga thilpêkin nge Pathian tilâwm lo?

•  Thilpêk chungchânga Bible chângte

 Thilpêk hi phal taka pêk a nih hian a lâwmawm hle a. Bible chuan: “Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin pe ṭheuh rawh se; Pathian chuan hlim taka petu a ni a hmangaih ni,” tiin a sawi a ni.—2 Korinth 9:7.

 Thinlung taka thil pêk hi Pathian pawm tlâk “sakhaw biak dân” pêng a ni a. (Jakoba 1:27) Phal taka ṭanpui ngaite ṭanpuitu chuan Pathian a thawhpui a, chutiang thilphalna chu Pathianin amah pûktîr angin a ngai a ni. (Thufingte 19:17) Bible chuan thilpêk petu chu Pathianin a rûl ang tih a zirtîr bawk.—Luka 14:12-14.

 Mahni hma sialna rilru put hmang neia pêkin. Entîr nân:

•   Mi fak hlawh duh vângin.—Matthaia 6:2.

•   Thil engemaw dawn lêt leh duh vângin.—Luka 14:12-14.

•   Chhandamna nih duh vângin.—Sâm 49:6, 7.

 Pathianin a dem thiltih, a nih loh leh rilru put hmang a thlâwpin. Entîr nân, mi tuemaw hnêna pawisa khelhna, a nih loh leh damdawi leh zu hman sualna atâna pawisa pêk chu a dik lo vang. (1 Korinth 6:9, 10; 2 Korinth 7:1) Chutiang bawkin, sum leh pai thawk chhuak thei tuemaw, mahse thawk duh si lo hnêna sum pêk chu a inâwm lo.—2 Thessalonika 3:10.

 Pathian pêk mawhphurhnate a tihbuaiin. Bible-in chhûngkaw lûte chu an chhûngkaw mamawh an ngaihsak tûr a ni tih a zirtîr a. (1 Timothea 5:8) Chhûngkaw lûin a chhûngkua, dinhmun hlauhawma dah khawpa mi dang a ngaihsak chu a dik lo vang. Chutiang bawkin, Isua’n an thil neih zawng zawngte “Pathian hnêna pêk” a ni tawh tia sawia kum upa an nu leh pate mamawh pe duh lote chu a dem a ni.—Marka 7:9-13.