Dibola chu a awm tak tak a. Ani chu mi sual rawn ni a, Pathian laka hel thlarau thil siam a nih bâkah, he “khawvêl lal” a ni bawk. (Johana 14:30; Ephesi 6:11, 12) Bible-in Diabola nihna chu a hming leh a hrilhfiahna nên hetiang hian a târ lang a ni:

•   Setana, a awmzia “Dodâltu.”—Joba 1:6.

•   Diabola, a awmzia “Sawichhetu.”—Thu Puan 12:9.

•   Rûl, hei hi Bible-ah “Bumtu” tia hman a ni.—2 Korinth 11:3.

•   Thlêmtu.—Matthaia 4:3.

•   Dâwt pa.—Johana 8:44.

Diabola chu mihringa awm sual lam ngaihtuahna mai a ni lo

 Mi ṭhenkhat chuan Diabol-Setana chu keimahnia awm sual lam ngaihtuahna ang lekin an ngai a. Mahse, Bible chuan Pathian leh Setana inbiakna chungchâng a chhinchhiah a ni. Pathian chu a ṭha famkim a, chuvângin amahah sual awm ang leh chumi nêna inbiak chu thil theih a ni lo. (Deuteronomy 32:4; Joba 2:1-6) Setana erawh chuan sual nei lo Isua chu a thlêm a. (Matthaia 4:8-10; 1 Johana 3:5) Chuvângin, Bible chuan Diabola chu a awm tak tak tih leh mihringa awm sual mai a ni lo tih a târ lang a ni.

 Mi tam takin Diabola a awm tak tak lo tih an ring hi mak kan ti tûr a ni em? Ni lo ve, Bible-in Setana’n a thiltumte hlen tûrin bumna a hmang tih a sawi a. (2 Thessalonika 2:9, 10) Bumna a hman zînga langsâr ber pakhat chu a awm tih ring lo tûra mi tam takte mit tihdelsak a ni.—2 Korinth 4:4.

Hriat sual: Lucifer-a chu Diabola hming dang a ni.

 Thu dik: “Vârparh” tih awmze nei Hebrai thu mal hi Bible ṭhenkhat chuan “Lucifer-a” tiin a letling a. (Isaia 14:12) A chheh vêl thute’n a târ lan angin, hei hian Pathianin an chapona avânga a tihtlâwm tâk Babulon lal inthlah chhâwngte a kâwk a. (Isaia 14:4, 13-20) “Vârparh” tih ṭawngkam hi Babulon lal thlah kal zêl tihtlâwm a nih hnua deusawhna atâna hman a ni.

Hriat sual: Pathianin Setana chu mi ṭha leh ṭha lo fiah nân a hmang a, chumi ṭanchhanin mite ro a rêlsak

 Thu dik: Diabola chu Pathian chhiahhlawh ni lovin, a hmêlma a ni a. Diabol-Setana chuan Pathian rawngbâwltute chu a dovin, dik lo takin a puh a ni.—1 Petera 5:8; Thu Puan 12:10.