Hrehawm nasa tak chuan mihringte tâna hun harsa ber a rawn thlen ang. Bible hrilh lâwkna sawi dân chuan chu chu ‘ni hnuhnûng,’ a nih loh leh “tâwpna hun” chhûngin a lo thleng ang. (2 Timothea 3:1; Daniela 12:4) Chu chu “hrehawmna nî a ni dâwn si a, chutiang chu Pathianin thil a siam ṭan tirh aṭanga tûn thlengin a la awm ngai lo va, awm pawh a awm leh tawh hek lo vang.”—Marka 13:19 NWT; Daniela 12:1; Matthaia 24:21, 22.

Hrehawm nasa tak chhûnga thil thleng tûrte

•   Sakhaw dik lo tihchhiatna. Thâwklehkhatah, sakhaw dik lo chu tihchhiat a ni thut ang. (Thu Puan 17:1, 5; 18:9, 10, 21) Chu chu khawvêl politics thuneihna entîrtu United Nations-in hma rawn lain Pathian duh zâwng a hlen chhuak ang.—Thu Puan 17:3, 15-18. a

•   Sakhaw dik beihna. Ezekiela inlârnaa ‘Magog rama Goga’ tia târ lan hnam insuih khâwm chuan sakhaw dik betute chu tihboral a tum ang. Amaherawhchu, Pathianin amah betute chu chhiatna lak ata a vênghim ang.—Ezekiela 38:1, 2, 9-12, 18-23.

•   Leia chêngte chunga rorêlna. Isua chuan mi zawng zawngte chungah ro a rêl ang a, “berâm vêngtuin kêl zîng ata berâmte a thliar hrang angin mite chu a thliar hrang ang.” (Matthaia 25:31-33) Chu rorêlna chu miin, vâna a rorêlpuitu tûr, Isua ‘unaute’ an thlâwp leh thlâwp lohvah a innghat ang.—Matthaia 25:34-46.

•   Lalram rorêltute lâk khâwmna. Krista nêna rorêl tûra thlante chu an lei lam nun an hman zawh hnuah, vâna kaihthawh an ni ang.—Matthaia 24:31; 1 Korinth 15:50-53; 1 Thessalonika 4:15-17.

•   Armageddon. He ‘Pathian Engkimtitheia ni ropuia indona’ hi “LALPA nî,” tia koh a ni bawk. (Thu Puan 16:14, 16; Isaia 13:9; 2 Petera 3:12) Krista’n mi sual anga ro a rêlsakte chu tihboral an ni ang. (Zephania 1:18; 2 Thessalonika 1:6-10) Hetah hian, Bible-in sakawlh lu sarih nei tia a sawi, khawvêl puma politics kal phung tihtâwpna a tel ang.—Thu Puan 19:19-21.

Hrehawm nasa tak hnua thil thleng tûrte

•   Setana leh a ramhuaite phuar behna. Vântirhkoh chak tak pakhatin Setana leh a ramhuaite chu eng mah ti thei lova siamin, “leilâwtah chuan a paih lût” ang. (Thu Puan 20:1-3) Leilâwta Setana dinhmun chu tân ina tâng ang a ni ang a; tu mah a bum thei tawh lo vang.—Thu Puan 20:7.

•   Kum Sâng Rorêl a inṭan. Pathian Ram chuan mihringte malsâwmna thlentu tûr kum 1,000 chhûng rorêlna chu a ṭan ang. (Thu Puan 5:9, 10; 20:4, 6) Chhiar sên loh “mipui tam tak” chuan “hrehawm nasa tak ata” dam khaw chhuakin, he leia Kum Sâng Rorêl inṭanna chu an hmu ang.—Thu Puan 7:9, 14; Sâm 37:9-11.