Mihringte tâna Pathian duh zâwng chu “inngaih bânsan” a ni tih Bible-in a sawi a. (1 Thessalonika 4:3) Bible-a “inngaih” tih ṭawngkamah hian uirêna te, mawngkaw hurna te, leh innei si lova mipa leh hmeichhe inkâra sex hman te a tel a ni.

•  Engvângin nge mipa leh hmeichhia inhmangaih a, chên dun duhte chu Pathianin innei tûra a duh?

•  Inkawp rem thei tûr an ni em tih hriat nâna inneih hmaa chên dun hi eng nge ni ve?

•  Engtin nge nupate’n an inneihna an tihngheh theih?

•   Inneihna chu Pathian din a ni. Nupa tuak hmasa berte a inneihtîr khân chu chu a din ṭan a. (Genesis 2:22-24) Inneihna thutiam awm si lova mipa leh hmeichhia chên duntîr chu a tum a ni lo.

•   Pathianin mihringte tâna ṭha ber tûr a hria. Ani chuan chhûngkuaa mi zawng zawngte hlâwkpui tûr leh vênghimtu atân inneihna chu mipa leh hmeichhe inkâra inzawmna nghet tak ni tûrin a din a. Tehkhin thu mâwlmang tak hi lo ngaihtuah ta ila. Bungruate dik taka rem khâwm dân tûr chu a siam chhuaktute kaihhruainain a târ lang angin, Pathian kaihhruainate chuan chhûngkaw inlaichînna hlawhtling tak neih dân min hrilh a. Pathian tehnate chu a zâwmtute’n an hlâwkpui reng ṭhîn.—Isaia 48:17, 18.

•   Innei lova sex hmanna chuan sawhkhâwk pawi tak a nei thei. Entîr nân, duh lo chunga naupaina te, sex hmanna aṭanga inkaichhâwn theih natna te, leh rilru hahna nasa takte a thlen thei a ni.

•   Pathian chuan mipat hmeichhiat hmanna aṭanga chi thlah theihna a pe. Pathianin nunna hi thil thianghlim angin a thlîr a, chi thlah theihna chu thilpêk hlu tak a ni. Inneihna chawimawina hmanga chu a thilpêk chu zah tûrin min duh bawk.—Hebrai 13:4.

 Inneihna hlawhtling tak nei tûrin intiam kamna tel lova hun engemaw chen chên dun hmasak phawt a ṭûl kher lo. Chu aiin, an inlaichînna ṭhang chho zêl tûra an pahniha an thutiamte an tihngheh a, an harsatnate hmachhawn tûra an thawh dun a ngai zâwk. a Inneihna chuan intiamna a tinghet lehzual a ni.—Matthaia 19:6.

 Inneihna ṭha famkim a awm lo. Amaherawh chu, nupate chuan Bible thurâwn nunpuiin inneihna hlawhtling tak an nei thei a ni. Entîrna ṭhenkhat lo en ta ila:

•   I mamawh aiin i kawppui mamawh dah hmasa rawh.—1 Korinth 7:3-5; Philippi 2:3, 4.

•   Hmangaihna leh inzahtawnna nei chho rawh u.—Ephesi 5:25, 33.

•   I thusawi thunun dân zir rawh.—Thufingte 12:18.

•   Dawhthei tak ni la, ngaidam nghâl ṭhîn rawh.—Kolossa 3:13, 14.