Isua inthawina hi sual leh thihna ata mihringte chhanchhuah, a nih loh leh chhandam nân Pathianin a hmang a. Bible-in Isua thisen chhuak chu tlanna man angin a târ lang bawk. (Ephesi 1:7; 1 Petera 1:18, 19) Chuvângin, Isua chuan “mi tam tak tlan nâna a nun pe” tûrin a lo kal tih a sawi.—Matthaia 20:28.

Engvângin nge “mi tam tak tâna tlanna” a ngaih?

 Mihring hmasa ber Adama chu ṭha famkim, a nih loh leh sual nei lova siam a ni a. Chatuana nun theihna a nei a; mahse, Pathian thu âwih loh thlangin chu chu a hloh ta a ni. (Genesis 3:17-19) Fate rawn neiin, chu sual chu an hnênah a rochun a. (Rom 5:12) Chuvângin, Bible-in Adama’n amah leh a fate chu sual leh thihna bâwihah a “hralh” tih a sawi. (Rom 7:14) Mi ṭha famkim lo tumahin Adama hloh tâk chu an lei lêt leh thei tawh lo.—Sâm 49:7, 8.

 Pathianin Adama thlahte beisei bo dinhmun chu a khawngaih a. (Johana 3:16) Mahse, Pathian rorêlna dik tehna avângin chhan ṭha tak nei lo chuan an sualte chu en kân, a nih loh leh ngaidam ngawt theih an ni lo vang. (Sâm 89:14; Rom 3:23-26) Pathian chuan mihringte a hmangaih êm avângin an sualte ngaihdam nân mai ni lovin, nuaibo sak tûrin dân ang takin ruahmanna a siam a. (Rom 5:6-8) Chu dân ang taka ruahmanna chu tlanna a ni.

Tlanna chu eng nge ni?

 Bible-a “tlanna” tih thu malah hian a hnuaia thil pathumte hi a tel:

1.   Man pêk tihna a ni.—Numbers 3:46, 47.

2.   Chhuah zalênna a pe.—Exodus 21:30.

3.   A tlukpui hlutna a pe, a nih loh leh a khuh bo. a

 Hêng thil pathumte Isua Krista tlanna inthawinaa hman a nih dân lo ngaihtuah ta ila.

1.   Man pêk. Bible-in Kristiante chu ‘mana lei an ni tawh’ tih a sawi a. (1 Korinth 6:20; 7:23) Chu man chu Isua thisen a ni a, ani chuan ‘chi tina mi te, ṭawng tina mi te, mi tina mi te, hnam tina mi te chu Pathian tân a thisenin a lei a ni.’—Thu Puan 5:8, 9.

2.   Chhuah zalênna. Isua inthawina chuan sual lak aṭanga ‘tlan chhuahna’ a pe.—1 Korinth 1:30; Kolossa 1:14 Mizo Common Version; Hebrai 9:15.

3.   A tlukpui. Isua inthawina chu Adama chân tâk—mihring nun ṭha famkim—nên a intluk chiah a. (1 Korinth 15:21, 22, 45, 46) Bible chuan: “Mi pakhat [Adama] tihmawh avâng khân mi tam tak chu mi sual an lo ni ta a; chutiang bawkin mi pakhat [Isua Krista] tihâwih avâng khân mi tam tak chu mi fel an lo ni ang,” tiin a sawi a ni. (Rom 5:19) Hei hian mi pakhat thihnain mi sual tam tak tân tlanna a pêk theih dân a târ lang a. A nihna takah chuan Isua inthawina chu, hlâwkpui tûra a ṭûl anga hma la “mi zawng zawng tlan nâna a tlukpui tlanna” a ni.—1 Timothea 2:5, 6, NWT.