Awm e, Bible hian Pathian a awm tih finfiahna rin tlâk tak a pe a. Mahse, sakhaw thurinte pâwngpaw rin mai lo va, “engkim fiah” tûr leh kan “hriat theihna” hmanga Pathian rinna nei tûrin min fuih a ni. (1 Thessalonika 5:21; 1 Johana 5:20) Bible ṭanchhan a hnuaia chhût dânte hi ngun takin ngaihtuah ang che:

•   Kalphung fel tak leh nunna neite awmna lei leh vân hian Siamtu a nei tih a târ lang. Bible chuan: “In tin hian dintu tuemaw a nei zêl ang hian, thil zawng zawng dintu chu Pathian a ni,” tiin a sawi. (Hebrai 3:4, Mizo King James Bible) He thil chhût dân hi mâwl mang hle mah se, lehkha thiam tam tak chuan thiltithei tak niin an hria a ni. a

•   Mihring kan nih angin, kan tisa lam mamawh kan phuhhrûk hnuah pawh nun awmzia leh nunin a tumte hriat châkna chu kan pianpui a. Chuvângin, Bible chuan tisa lam ṭâmna ni lovin, thlarau lama ṭâmna chungchâng a sawi a, chutah chuan Pathian hriaa amah biak a tel a ni. (Matthaia 4:4; Thu Puan 4:10, 11) He thlarau lam mamawh hian Pathian a awm tih mai bâkah, ani chu, chu kan mamawh min phuhhrûksak duhtu hmangaihna nei tak Siamtu a ni tih a târ lang bawk a ni.

•   Bible hrilh lâwkna chipchiar takte chu a hma kum zabi tam taka ziak a ni a; mahse, a sawi lâwk ang chiah chiahin a thleng famkim ṭhîn. Chûng hrilh lâwkna chipchiar tak leh dik takte chuan mihring theihnaa chhuak a ni lo tih chiang takin a hril a ni.—2 Petera 1:21.

•   Bible ziaktute chuan an dam rualpuite hriatthiam phâk bâkin science lam thila hriatna an nei a. Entîr nân, hmân lai mi tam tak chuan leilung hi sai, sanghal, leh bâwngpa ang chi ramsain a pû niin an ngai a. Chumi nêna inkalh takin, Bible chuan Pathianin “lei chu engmahlovah a khai kâng,” tiin a sawi. (Joba 26:7) Chutiang bawkin, Bible chuan leilung chu “kualkhungna” nei anga târ langin a mûmzia a sawi bawk. (Isaia 40:22) Hetianga Bible ziaktute’n hriatthiamna sâng tak an nei hi Pathian hriattîrna an dawn vâng nia rin chu hrilhfiahna inâwm ber niin mi tam tak chuan an ngai a ni.

•   Bible chuan a chhânna lungawithlâk hmuh loh huna Pathian rinna min hlohtîr thei zawhna khirh tak takte chu a chhâng a ni. Entîr nân: Pathian hi hmangaihna nei tak leh engkimtithei a nih chuan, engvângin nge khawvêlah hian hrehawm tawrhna leh suahsualnate a awm? Engvângin nge sakhuate hi thil ṭha aia thil ṭha lo tihna thlentu a nih fo ṭhin?, tihte hi.—Tita 1:16.