Bible-in Isua chu “Pathian Fapa” tiin a sawi ṭhîn a. (Johana 1:49) He “Pathian Fapa” tih ṭawngkam hian Pathian chu Siamtu, a nih loh leh Isua pawh tiamin nunna nei zawng zawng lo chhuahna Hnâr a ni tih a nemnghet a ni. (Sâm 36:9; Thu Puan 4:10, 11) Bible-in Pathian chu mihringte’n fate an nei anga fa nei tak tak angin a zirtîr lo.

 Bible chuan vântirhkohte pawh “Pathian fapate” tiin a ko bawk a. (Joba 1:6) Chu bâkah, mihring hmasa ber Adama chu “Pathian fa” tiin a ko a ni. (Luka 3:38) Mahse, Isua chu Pathian thil siam hmasa ber leh Pathianin a kut ngeia a siam awmchhun a nih avângin Bible-in Pathian Fapa piang hmasa ber tiin a sawi a ni.

•  Isua chu leia a rawn pian hmain vânah a awm tawh em?

•  Isua’n leia a rawn kal hmain eng nge a tih?

 Awm tawh e. Isua chu leia mihring anga a rawn pian hmain vânah thlarau thil siam niin a awm tawh a. Amah ngeiin: “Vân aṭanga lo chhuk ka ni,” tiin a sawi.—Johana 6:38; 8:23.

 Pathian chuan thil dang engmah a siam hmain Isua a siam a. Isua chungchângah Bible chuan heti hian a sawi:

•   “Ani chu . . . thil siam zawng zawnga piang hmasa ber chu a ni.”—Kolossa 1:15.

•   Ani chu “Pathian thil siam bula” a ni.—Thu Puan 3:14.

 “A lo chhuahna chu hmasâng ata, chatuan aṭangin a ni” tia mi pakhat chungchâng hrilh lâwkna hi Isua’n a thlen famkimtîr a ni.—Mika 5:2; Matthaia 2:4-6.

 Vânah dinhmun sâng tak a chelh. Isua chuan he a nihna hi: “Ka Pa, khawvêl awm hmaa i hnêna mawina ka neih khân . . . mi chawimawi rawh,” tia a ṭawngṭai khân a târ lang a ni.—Johana 17:5.

 Thil dang zawng zawng siamnaah a Pa a pui. Isua chuan Pathian bulah “mi themthiam angin” hna a thawk a. (Thufingte 8:30) Isua chungchângah Bible chuan: “Amahah chuan engkim siam a ni a, vâna awmte, leia awmte nên,” tiin a sawi a ni.—Kolossa 1:16.

 Pathianin Isua hmangin thil dang zawng zawng a siam a. Hêng thil siamah hian thlarau thil siamte mai bâkah, lei leh vân pawh a tel. (Thu Puan 5:11) Dinhmun ṭhenkhatah chuan Pathian leh Isua thawh dunna hi engineer leh in satu thawh dunna nên a inang a. Engineer-in a riruang a duang a; in satuin chu chu a takah a chantîr a ni.

 Ani chu Thu-a a ni. Bible-in Isua mihring anga a nun hma chanchin a sawinaah, ani chu “Thu” tiin a ko va. (Johana 1:1) Hei hian Pathianin a Fapa chu thlarau thil siamte hnênah hriattîrna leh kaihhruaina pe tûrin a hmang tih a tichiang a ni.

 Isua chuan leia mihringte hnêna Pathian Thusawitu angin hna a thawk bawk niin a lang. Pathianin Eden huana Adama leh Evi te hnêna kaihhruaina a pêk lai khân, Thu-a Isua kaltlang hian a biak ngei a rinawm. (Genesis 2:16, 17) Hmânlai Israel mite’n thlalêr an kaltlang laia hruaitu leh a thu an âwih ngei tûr vântirhkoh kha Isua hi a nih hmêl bawk.—Exodus 23:20-23. a