Bible-a “thawhlehna” tia lehlin Grik thu mal hi a·naʹsta·sis tih aṭanga lo kal a ni a, a awmzia chu “tho chhuak,” a nih loh leh “ding chhuak leh” tihna a ni. Tho leh tu emaw chu thihna ata kaihthawh a ni a, a thih hmaa a miziate leh a rilru put hmangte chu a nei leh a ni.—1 Korinth 15:12, 13.

 “Thawhlehna” tih thu mal hi Thuthlung Hlui tia koh Hebrai Pathian Lehkha Thu-ah chuang lo mah se, hemi chungchâng zirtîrna erawh a chuang a ni. Entîr nân, Pathian chuan zâwlnei Hosea kal tlangin heti hian a tiam a ni: “Thlân thiltihtheihna lakah ka tlan chhuak ang a, thihna ata ka chhan chhuak ang,” tiin.—Hosea 13:14, Mizo King James Bible; Joba 14:13-15; Isaia 26:19; Daniela 12:2, 13.

 Mite chu khawia nung tûra kaihthawh nge an nih ang? Mi ṭhenkhat chu Krista nêna rorêl tûra vân nunna changa kaihthawh an ni a. (2 Korinth 5:1; Thu Puan 5:9, 10) Chu chu Bible-in ‘thawhlehna hmasa ber’ tia a sawi avângin, thawhlehna dangin a rawn zui dâwn tih a târ lang a ni. (Thu Puan 20:6) Thawhlehna hnuhnûng zâwkah chuan, mi a tam zâwkte chu leia nung tûra kaihthawh leh an ni ang.—Sâm 37:29.

 Engtin nge mite chu kaihthawh an nih ang? Pathianin Isua chu mitthite kaihthawh theihna a pe a. (Johana 11:25) Isua chuan, “hriatrengna thlâna awm zawng zawngte” chu an nihna, mizia, leh hriatna ngai neiin a kaitho vang. (Johana 5:28, 29, New World Translation) Vân nunna changa kaihthawhte chuan thlarau taksa an nei ang a, leia nung tûra kaihthawhte erawh chuan hrisêlna ṭha famkim an nei ang.—Isaia 33:24; 35:5, 6; 1 Korinth 15:42-44, 50.

 Tute nge kaihthawh ni ang? Bible chuan, “mi felte leh fel lote thawhlehna a awm ang,” tiin a sawi a. (Tirhkohte 24:15) Mi felte zîngah chuan Nova te, Sari te, leh Abrahama te ang mi rinawmte an tel a. (Genesis 6:9; Hebrai 11:11; Jakoba 2:21) Mi fel lote zîngah chuan Pathian tehnate zirna hun leh zawmna hun remchâng nei lova thite an tel a ni.

 Chutih rualin, hre reng chunga Pathian tehnate zâwm duh lotu mi suaksualte erawh chu kaihthawh an ni lo vang. Chutiang mite chu an thih hian thawhleh beiseina nei lova chatuana tihboral an ni.—Matthaia 23:33; Hebrai 10:26, 27.

 Thawhlehna chu engtikah nge a thlen ang? Bible-in vân nunna chang tûra thawhlehna kum 1914 aṭanga inṭan Krista lo awm lehna hun chhûngin a thleng ang tih a sawi lâwk a. (1 Korinth 15:21-23) Leia nung tûra thawhlehna erawh chu lei pumpui paradis-a siam a nih hun, Isua Krista Kum Sâng Rorêl chhûngin a thleng ang.—Luka 23:43; Thu Puan 20:6, 12, 13.

 Engvângin nge thawhlehna rin chu thil inâwm tak a nih? Bible-ah hian mitthi tho leh pakuate chungchâng târ lan a ni a, chûng thilthleng tinte chu mit ngeia hmutute pawh an awm a ni. (1 Lalte 17:17-24; 2 Lalte 4:32-37; 13:20, 21; Luka 7:11-17; 8:40-56; Johana 11:38-44; Tirhkohte 9:36-42; Tirhkohte 20:7-12; 1 Korinth 15:3-6) A bîk takin, Isua’n Lazara a kaihthawhna chu a chhinchhiah tlâk hle a; a chhan chu, ni lî lai a thih tawh avâng leh chu thilmak chu Isua’n mipui hmaa a tih vâng a ni. (Johana 11:39, 42) Amah dodâltute ngei pawhin chu thilthleng chu an hriat chian êm avângin, Isua leh Lazara tihlum tûrin ruahmanna an siam ta hial a ni.—Johana 11:47, 53; 12:9-11.

 Bible chuan Pathianin mitthite kaihthawh theihna leh kaihthawh châkna a nei tih a sawi a. Ani chuan a thiltihtheihna hmanga a kaihthawh tûrte chanchin chu tâwp chin nei lo a hriat rengnaah kimchang takin a chhinchhiah a ni. (Joba 37:23; Matthaia 10:30; Luka 20:37, 38) Chu bâkah, mitthite chu a kaitho thei mai ni lovin, kaihthawh leh ngei a duh bawk! Chuvângin, Bible chuan thawhlehna lo thleng tûr nêna inkûngkaihin Pathian chungchângah: “I kut hnathawh i ngaina a ni,” tiin a sawi.—Joba 14:15.

Thawhlehna chungchânga ngaih dân dik lote

 Ngaih dân dik lo: Thawhlehna chu taksa leh thlarau inzawm lehna a ni.

 Thu dik: Bible chuan mi a thih hian ani chu a awm tawh lo tih leh thlarau thi thei lo a nei lo tih a zirtîr a. (Thuhriltu 9:5, 10) Chuvângin, tu emaw kaihthawh lehna chu mi tam tak rin dân anga taksa leh thlarau inzawm lehna a ni lo; ani chu mi nung ni tûra siam thar leh a ni mai zâwk a ni.

 Ngaih dân dik lo: Mi ṭhenkhat chu kaihthawh an nih hnuah tihboral lehnghâl an ni.

 Thu dik: Bible chuan: “Thil sual titute chu thiam loh changin an tho leh ang,” tiin a sawi a. (Johana 5:29) Mahse, an thih hmaa an thiltih ni lovin, kaihthawh an nih hnua an thiltih ṭanchhana thiam loh chantîr, a nih loh leh rorêlsak an ni ang. Isua chuan: “Mitthiten Pathian Fapa aw an hria ang a, a hria apiang an nung ang,” tiin a sawi a. (Johana 5:25) An thawhleh hnua an thu zirte “hria,” a nih loh leh zâwmtu apiangte chu ‘nunna buah’ an hming chhinchhiah a ni ang.—Thu Puan 20:12, 13.

 Ngaih dân dik lo: Kaihthawh leh tu emaw chuan a thih hmaa a taksa ngai ang chiah a pu leh.

 Thu dik: Mi a thih hian a taksa chu a ṭawih ral a, vaivutah a chang leh a ni.—Thuhriltu 3:19, 20.