Keini Jehova Thuhretute hian kan chhûngkua leh mi dangte chhûngkua tihngheh chu kan tum tlat a. Chhûngkaw Dintu a nih angin, Pathian chu kan zah a ni. (Genesis 2:21-24; Ephesi 3:14, 15) Ani chuan khawvêl puma mite chu Bible hmangin inneihna nghet leh hlimawm nei tûra ṭanpuitu thu bulte a zirtîr a ni.

 Bible thurâwn chuan pasal ṭha zâwk, nupui ṭha zâwk, leh nu leh pa ṭha zâwk ni tûra min ṭanpui avângin zui hrâm hrâm kan tum a. (Thufingte 31:10-31; Ephesi 5:22–6:4; 1 Timothea 5:8) Bible-a kan hmuh finna chuan sakhaw thuhmun vuan lo chhûngkuate pawh hlawhtling tûrin a ṭanpui thei a ni. (1 Petera 3:1, 2) Thuhretu ni lo an kawppui Jehova Thuhretu ni tate thusawi hi lo ngaihtuah ta ila:

•   “Kan inneih tirh kum ruk chhûng chu inhnial leh intithinrim rêng rêngin kan khawsa a. Mahse, ka nupui Ivete-i chuan Thuhretu a nih hnuah hmangaihna leh dawhtheihna a nei lehzual a. A inthlâk danglamna chuan kan inlaichînna a siam ṭha a ni.”—Clauir-a, Brazil.

•   “Ka pasal Chansa-a’n Jehova Thuhretute nêna Bible a zir ṭan chuan ka dodâl a, a chhan chu chhûngkaw tikehdarhtuah ka ngaih vâng a ni. Mahse, chumi hnu aṭang chuan Bible-in kan inlaichînna a tinghet tih ka hre thiam ta a ni.”—Agness-i, Zambia.

 Kan rawngbâwlnaah mite chu Bible-a finna thute nunpuinain . . .

•   Kawppui tûr fing taka thlang tûr te

•   Inneih kum khatna hlawhtling taka hmachhawn tûr te

•   An kawppui chhûngte ṭha taka dâwr tûr te

•   Sum enkawl thiam tûr te

•   Inhnial bânsan tûr te

•   Ngaihdam dân hre tûr te leh

•   Fate zirtîr tûrtein a ṭanpui thei tih kan hmuh a ni.

 A châng chuan a thlen a ni. Entîr nân, Sofres company-in kum 1998 khân nupa tuak 20 a zir chianna aṭangin tuak khat chuan a pakhat zâwk Thuhretua a inleh hnuah buaina nasa tak an nei tiin a report a ni.

 Isua chuan a zirtîrna zâwmtute’n an chhûngkuaah hrehawm tawrh châng an nei dâwn tih a sawi lâwk a. (Matthaia 10:32-36) Hmânlai chanchin zir mi Will Durant-a chuan heti hian a chhinchhiah: Rom Lalram awpna hnuaiah, “Kristianna chu chhûngkaw tikehdarhtu anga ngaih a ni,” a tiin. Tûn laiah pawh chutiang puhna tho chu Jehova Thuhretu ṭhenkhatin an tâwk a. Hei hi Thuhretute’n chhûngkua an tikehdarh tihna a ni em?

 Jehova Thuhretute chhûngkaw tikehdarhtu anga puhna chungchânga rorêlnaah, European Court of Human Rights chuan Thuhretu ni lo a chhûngkaw member-te’n, “Thuhretu ni tain zalên taka sakhaw dang a vawn theihna chu pawm” lovin buaina an thlen fo ṭhîn tiin a sawi a. Court chuan heti hian a sawi belh a ni: “Hei hi Jehova Thuhretuteah chauh ni lovin, sakhaw thuhmun lo vuantu chhûngkua zawng zawngah a thleng a ni,” tiin. b Jehova Thuhretute chuan an sakhaw vawn avânga huatna an hmachhawn chung pawhin, Bible fuihna: “Tu sual pawh sualin thungrûl suh u. . . . A theih phawt chuan nangmahni lam tal, mi zawng zawng nên inremin awm rawh u,” tih hi zawm an tum tlat a ni.—Rom 12:17, 18.

 Thuhretute chuan “Lalpaa awm mi” chauh—an rinna ṭâwmpuitute chauh—nei tûra Bible kaihhruaina chu an zâwm a. (1 Korinth 7:39) He thupêk hi Bible thu nêna a inmil bâkah, a ṭangkai hle a ni. Entîr nân, kum 2010 chhuak Journal of Marriage and Family tih thuziak chuan, “sakhaw thuhmun vuan nupate chu sakhaw lam thiltiha an tel dun theih bâkah, an thurinte an sawi dun theih” avângin an inlaichînna a nghet lehzual tih a sawi. c

 Mahse, Thuhretute chuan an rinpui unaute chu Thuhretu ni lo an kawppuite ṭhen tûrin an fuih lo. Bible chuan: “Unau tu pawhin nupui ringlomi nei sela, ani chuan a hnêna awm reng a lungnih chuan ma suh se. Tin, hmeichhia, pasal ringlomi nei chuan a pasalin a hnêna awm reng a lungnih chuan ṭhen suh se,” tiin a sawi si a. (1 Korinth 7:12, 13) Jehova Thuhretute chuan he dân hi an zâwm a ni.