Hriat sual: Jehova Thuhretute’n Easter an lawm loh chhan chu Kristian an nih loh vâng a ni.

 Thu dik: Isua Krista chu min Chhandamtu a ni tih kan ring a, ‘a hniaka zui tûrin’ theih tâwp kan chhuah bawk.—1 Petera 2:21; Luka 2:11.

 Hriat sual: Isua chu thihna ata a tho leh tih in ring lo.

 Thu dik: Isua thawhlehna chu kan ring a; chu chu Kristian rinna innghahna ber a ni tih kan hria a, kan thu hrilhna hmangin kan lantîr a ni.—1 Korinth 15:3, 4, 12-15.

 Hriat sual: In fate’n Easter lawmnaa hlimna an neih ve loh chu pawi in ti lo.

 Thu dik: Kan fate chu kan hmangaih a—anmahni zirtîr tûr leh hlimna an neih theihna tûra ṭanpui tûrin kan tih theih apiang kan ti a ni.—Tita 2:3-5.

•   Easter kût hi Bible ṭanchhana neih kût a ni lo.

•   Isua chuan a thawhlehna ni lovin, a thihna hriatrengna hmang tûrin thu min pe a. He Hriatrengna hi Bible calendar aṭanga chhûtin kum tin Isua thih chamah kan hmang ṭhîn a ni.—Luka 22:19, 20.

•   Easter chîn dân hi inthlah punna lama hmân lai puithuna âtthlâk aṭanga lo chhuak a nih avângin Pathianin a pawm kan ring lo. Pathian chuan a hnênah “inpêkna pumhlûm” kan pêk a phût a, a pawm loh zâwng thil chînte hmanga amah biakna chu a lâwm lo a ni.—Exodus 20:5, New World Translation; 1 Lalte 18:21.

 Easter lawmna laka inthiar fihlîm tûra kan thu tlûkna siam hian mihring thurochhiah zâwm mai lo va, “finna leh ngaihruat thiamna dik tak” hmang tûra min fuihtu Bible a ṭanchhan tlat tih kan ring a ni. (Thufingte 3:21; Matthaia 15:3) Easter chungchânga zawhna min zawh hunah kan thurin kan hrilhfiah rualin, mi tinin an thiltih tûra thu tlûkna siam tûra dikna an neih chu kan zahsak a ni.—1 Petera 3:15.