A hnuaia thute hi Jehova Thuhretute sipaia an ṭan loh chhante a ni:

1.   Pathian thu an awih. Bible chuan Pathian chhiahhlawhte’n “an khandaihte chu leilehna hmâwr zumahte an chher ang” tih leh “indo dân pawh an zir tawh hek lo vang” tih a sawi a ni.—Isaia 2:4.

2.   Isua thu an âwih. Isua’n tirhkoh Petera chu: “I khandaih kha a dahnaah dah leh rawh, khandaih ruaitu zawng zawng chu khandaih vêkah an thi dâwn si a,” tiin a hrilh a. (Matthaia 26:52) Chutiang chuan Isua’n a hnungzuitute chu indona hriamhreite chelek lo tûrin a hrilh a ni.

    Isua zirtîrte chuan politics thila tualdâwihna vawng tlatin, ‘khawvêla mi ni lo’ tûra Isua thupêk chu an zâwm a. (Johana 17:16) Sipaite thiltih chu an dodâl lo va, a nih loh leh sipaia ṭan thlangtute chu ṭang lo tûrin an hrilh lo bawk.

3.   Mi dangte an hmangaih. Isua’n a zirtîrte chu “inhmangaih” tawn tûrin thu a pe a. (Johana 13:34, 35) Chutiang chuan khawvêl pum huap inunauna an siam ang a, tumahin an unaute an do ngai lo vang.—1 Johana 3:10-12.

4.   Kristian hmasate entawn tûr siam. Encyclopedia of Religion and War chuan: “Isua hnungzuitu hmasa berte chuan indonaa tel leh sipaia ṭan an hnâwl a,” chutiang thiltihte chu “Isua hmangaihna thiltih leh hmêlmate hmangaih tûra a thupêk nên a inkalh,” tih an hria a ni. Chutiang bawkin, Isua zirtîr hmasate chuan: “Kristian nih leh sipaia ṭan hi thil kal kawp thei lo angin an ngai,” tiin German theologian Peter Meinhold-a chuan a sawi.

 Jehova Thuhretute chu vântlâng tâna ṭangkai tak an nih bâkah, an chênna ram himna atâna hlauhawmin an che ngai lo. Hêng Bible thupêkte nêna inmilin sawrkâr thuneitute chu kan zah a ni:

•   “An chunga rorêltute thu thuin awm rawh se.”—Rom 13:1.

•   “Kaisara thilte chu Kaisara hnênah pe ula, Pathian thilte chu Pathian hnênah pe ta che u.”—Matthaia 22:21.

 Chuvângin, dân te kan zâwm a, chhiahte kan chawi a, vântlâng ṭhatna tûra sawrkâr hnathawhte chu ṭha takin kan thlâwp bawk a ni.