Governing Body chu khawvêl puma Jehova Thuhretute hnêna kaihhruaina petu Kristian puitling pâwl tlêm tê an ni a. An hnathawh chi hnih chu hei hi a ni:

•   Thu leh hla chhuah te, inkhâwm te, leh Jehova Thuhretute school-te kal tlanga pêk Bible ṭanchhan zirtîrnate buatsaihnate a enkawl a ni.—Luka 12:42.

•   Vântlâng hmaa kan rawngbâwlna kaihruaiin leh thawhlâwm hman dân enkawlin Jehova Thuhretute khawvêl pum huap rawngbâwlna a enkawl a ni.

 Governing Body chuan kum zabi khatnaa Kristian kohhran pum aiawha thu tlûkna pawimawh tak siamtu “Jerusalem khuaa tirhkohte leh upate” tih dân chu a zui a. (Tirhkohte 15:2) Chûng mipa rinawmte ang bawkin, Governing Body member-te chu kan inawpna pâwl hruaitute an ni lo. Anni chuan Bible kaihhruainate an zawng a, Pathian Jehova’n Isua Krista chu kohhran Lû-ah a ruat tih an pawm a ni.—1 Korinth 11:3; Ephesi 5:23.

 Governing Body member-te chu Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, leh Jeffrey Winder te an ni a. Anni hian U.S.A., New York, Warwick-a kan world headquarters-ah rawng an bâwl a ni.

 Governing Body chuan kawng hrang hranga kan rawngbâwlna enkawl tûrin committee paruk a din a, member tinte chu hêng committee-tea pakhatah emaw, a aia tamah emaw an tel a ni.

•   Coordinators’ Committee: Dân lam thil leh leilung chhiatna te, sakhaw thurin avânga tihduhdah tuar Jehova Thuhretute chunga thilthleng te, leh Jehova Thuhretute nghawngtu thilthleng pawimawh dangte chu a enkawl a ni.

•   Personnel Committee: Bethel chhûngkuate inruahmanna a enkawl a ni.

•   Publishing Committee: Bible ṭanchhan thu leh hlate tihchhuahna leh thawn chhuahna te, inkhâwmna hmun te, ṭawng lehlinna office te, leh branch inte sakna a enkawl a ni.

•   Service Committee: “Ram chanchin ṭha” hrila kan rawngbâwlna a enkawl a ni.—Matthaia 24:14.

•   Teaching Committee: Thlarau lama zirtîrna atâna hman inkhâwm te, school te, leh ngaihthlâk tûr aw thun leh video-te buatsaihna a enkawl a ni.

•   Writing Committee: Khâwla chhut chhuah emaw, kan website aṭang emawa pêk thlarau lama zirtîrna a buatsaih a, ṭawng lehlin hna a enkawl bawk a ni.

 Hêng committee-te hna bâkah, Governing Body member-te chu inawpna pâwl mamawh ngaihtuahin kâr tin an inhmu khâwm ṭhîn a. Hêng inkhâwmahte hian member-te chuan Bible thute an sawiho va, Pathian thlarau thianghlim inkaihhruaitîrin, an pawm tlân theih tûr thu tlûknate siam an tum a ni.—Tirhkohte 15:25, 26.

 Anni hi Governing Body committee-te ṭanpuitu Kristian mi rin tlâk takte an ni a. (1 Korinth 4:2) Ruat an nihna committee-a hnate enkawl tûra theihna nei leh tawn hriat ngah tak an nih bâkah, chawlhkâr tina inkhâwmnaah an tel ziah bawk. Thu tlûkna siamnaah tel lo mah se, thurâwn ṭangkai tak leh a thu ṭo bul an pe a, committee thu tlûkna angin hna an thawk a, chu thu tlûkna rah chhuah chu an enfiah ziah ṭhîn a ni. Hêng mite hi Governing Body-in khawvêl hmun hrang hranga kan unaute tlawh tûr leh hun pawimawh annual meeting, a nih loh leh Gilead graduation ang chîahte chanvo a pe ṭhîn a ni.